Arrestohet “bosja” e kontrabandimit me migrantët

Gjilan – Arjeta Ibrahimi nga Tërrnoci i madh është arrestuar nën dyshimin se në mënyrë të kundërligjshme ka përfituar të holla në vlerë të 400, 1000 dhe 1500 eurove duke kontrabanduar viktimat Erkan Emini dhe Muharrem Selimi të cilët i ka transportuar përmes Serbisë e Hungarisë në shtetet perëndimore, por që të njëjtit janë kapur dhe janë kthyer sërish .

Policia ka arritur ta arrestoj bosen e kontrabandimit me migrantët e Anamoravës, Arjeta Ibrahimin (1974) nga Tërrnoci i madh i Bujanocit. Prokurori i rastit Esat Ademi tha për agjencinë rajonale të lajmeve rajonipress se Arjeta Ibrahimi dyshohet për kontrabandim me migrantët e cila me qëllim të përfitimit të kundërligjshëm pasuror u ka marrë viktimave Erkan Emini dhe Muharrem Selimit nga 400, 1000 dhe 1500 euro për t`i transportuar në perëndim nëpërmjet Serbisë dhe Hungarisë me destinacion shtetin e Austrisë.

Sipas aktvendimit për zhvillimin e hetimeve e njëjta dyshohet edhe për falsifikim të pasaportave me viza të ndryshme të shteteve si Zvicër, Belgjikë e Gjermani.
Prokurori Esat Ademi tha se Prokuroria Themelore e Gjilanit ka bërë kërkesë për caktimin e masës së paraburgimit për të dyshuarën.

Viktimat e këtij rasti kanë thënë në hetuesi se i kanë dhënë të holla të dyshuarës dhe kanë tentuar të dalin në shtetet ku e kanë pasur destinacionin, mirëpo janë kthyer nga policia e atyre shteteve mbrapshtë pasi kanë pasur viza fallso.

Kryeprokurori i Prokurorisë Themelore në Gjilan, Jetish Maloku tha për rajonipress se rajoni i Anamoravës kohëve të fundit është i theksuar sa i përket kontrabandimit me migrantët, por kjo prokurori dhe organet tjera hetuese janë të përkushtuara për ta luftuar këtë dukuri e cila luftohet me të madhe nga të gjitha shtetet e Bashkimit Evropian./rajonipress/