Arrestime në Gjilan: Një i dyshuar për ndihmë kryesve të veprave penale dhe një tjetër për vrasje në tentativë

Gjilan – Policia e Kosovës, në bashkëpunim me Prokurorinë, ka realizuar dy arrestime të rëndësishme në qytetin e Gjilanit, në kuadër të hetimeve për vepra të rënda penale.

Sipas raportit zyrtar, më 26 mars 2026 është arrestuar një person i dyshuar në rrugën e Kamenicës, lidhur me veprën penale “Dhënia e ndihmës kryesve të veprave penale”, rast ky që daton nga 4 shkurti 2026. Me vendim të prokurorit, i dyshuari është dërguar në mbajtje për 48 orë.

Ndërkohë, po në të njëjtën datë, është arrestuar edhe një tjetër i dyshuar për rastin “Vrasje në tentativë”, i ndodhur më 18 mars 2026 në të njëjtën zonë. I dyshuari kishte qenë në arrati deri në momentin e arrestimit, ndërsa pas intervistimit, me urdhër të prokurorit kujdestar, është dërguar në qendrën e mbajtjes.

Autoritetet kanë bërë të ditur se hetimet lidhur me këto raste po vazhdojnë, ndërsa kanë theksuar përkushtimin për zbardhjen e plotë të rasteve dhe vendosjen e drejtësisë./rajonipress/