Armë gjuetie me 4 fishekë konfiskohet në Viti, vjedhje në një objekt në Novobërdë

Viti / Novobërdë – Policia e Kosovës ka ndaluar një person të dyshuar gjatë një pike kontrolli në komunën e Vitisë, ku gjatë kontrollit në veturën e tij është gjetur dhe konfiskuar një armë gjuetie me katër fishekë.

Sipas njoftimit zyrtar, i dyshuari është shoqëruar për procedura të mëtejme, ndërsa lidhur me rastin është njoftuar prokurori kompetent. Me vendim të tij, rasti procedohet në procedurë të rregullt.

Ndërkohë, në një rast tjetër në fshatin Parallovë të Novobërdës, është raportuar për një vjedhje në një objekt. Sipas policisë, persona të panjohur kanë depërtuar në objekt dhe kanë vjedhur disa pajisje të kuzhinës.

Rasti është duke u hetuar nga njësitet përkatëse hetimore, të cilat po punojnë në identifikimin e të dyshuarve dhe zbardhjen e plotë të rrethanave të ngjarjes.

Policia e Kosovës apelon tek qytetarët që të bashkëpunojnë me organet e rendit dhe të raportojnë çdo informacion që mund të ndihmojë në hetimin e rasteve të tilla./rajonipress/