Arifi dënon dëmtimin e varrezave dhe përmendores, Kllokoti i shokuar

Gjilan – Kryetari i komunës së Vitisë Nexhmedin Arifi ka dënuar aktin e mbrëmshëm të dëmtimit të pllakave në varrezat ortodokse në Kllokot, si dhe kundërshton veprimin e ndërmarrë nga OVL e UÇK-së të shkatërrimit të përmendores e cila ishte e vendosur në sheshin e qytetit që nga lufta e dytë botërore. Kurse Sasha Mirkoviq kryetar i Kllokotit tha se është i shokuar me akti vandal të dëmtimit të varrezave.

Kryetari i komunës Nexhmedin Arifi ka dënuar aktin e mbrëmshëm të dëmtimit të pllakave në varrezat ortodokse në Kllokot, si dhe kundërshton veprimin e ndërmarrë nga OVL e UÇK-së të shkatërrimit të përmendores e cila ishte e vendosur në sheshin e qytetit që nga lufta e dytë botërore.

“Në emër të institucioneve komunale dhe qytetarëve të komunës së Vitisë, shprehi indinjatën lidhur me rastin e mbrëmshëm të dëmtimit të varrezave ortodokse në Kllokot dhe vlerësoj se ky akt nuk i kontribuon stabilitetit në komunën tonë” thuhet në reagimin e Arifit.

Sipas tij akti i dëmtimit të varrezave është i papranueshëm të cilin e konsiderojmë si sulm mbi vlerat civilizuese dhe të besimit në vendin tonë. “Aktet e tilla si dëmtimi i varrezave është në kundërshtim me traditat, me tolerancën dhe respektin ndërmjet njerëzve të të gjitha komuniteteve dhe të gjitha besimeve që jetojnë në Kosovë, andaj si i tillë është i papranueshëm për ne. Kërkojmë nga organet e rendit që të zbulojnë akterët e kësaj ngjarje dhe ata t`i nxjerrin para drejtësisë” ka thënë ai.

Gjithashtu veprimi i OVL-së së UÇK-së sot në mesditë për shkatërrimin e Përmendores në Viti e cila është vendosur që nga Lufta e Dytë Botërore, nuk ka të bëjë me çështjen e Lapidarit të dëshmorëve në Preshevë. Veprimet e tilla, ne i kundërshtojmë pasi janë kundër vlerave të traditës së qytetarëve të Kosovës për tolerance e bashkëjetesë.

Kurse dëmtimin e varrezave e ka gjykuar edhe kreu i Kllokoti, t Sasha Mirkoviq.

Kreu i Komunës së re të Kllokotit, Sasha Mirkoviq, i cili jeton në afërsi të këtyre varrezave, deklaroi se është i shokuar me këtë akt vandal dhe ka kërkuar që sa më parë të zbulohen akterët e kësaj ngjarjeje .

Po sot në Kllokot në institucionet komunale, ka qëndruar edhe Slobodan Petroviq, Zëvendëskryeministër i Kosovës dhe Ministër i Ministrisë së Administratës Lokale të Kosovës i cili së bashku me kryetarin e komunës Sasha Mirkoviq, kanë mbajtur edhe një takim me një grup të qytetarëve të Klokotit, ku kanë dënuar këtë akt dhe kanë kërkuar që sa më parë të zbulohen akterët e këtij akti të shëmtuar.

Ministri Petroviq dhe kreu i komunës së Kllokotit kanë vizituar edhe varrezat e Kllokotit dhe nga afër ka parë edhe varrezat e dëmtuara ./rajonipress/