Prishtinë – Në vazhdën e afirmimit të sportistëve të njohur të Kosovës, ministri i Kulturës, Rinisë dhe Sportit, Memli Krasniqi ka pritur sot edhe ish-futbollistin e shquar kosovar e tani trajner te skuadra Dinamo Zagrebit, Ardian Kozniku.
Krasniqi u shpreh i nderuar që në emër të institucioneve të Kosovës t’i shprehë mirënjohje të thellë Koznikut për kontributin që ka dhënë në afirmimin e sportit të Kosovës, dhe mbi të gjitha për punën dhe sukseset e mëdha që ka treguar, e të cilat e kanë krenarë gjithë popullin e Kosovës.
Ai tha se Ardian Kozniku ka qenë dhe është një emër shumë i respektuar nga të gjithë, dhe për më tepër, është shembulli më i mirë për gjithë sportistët e rinj, që synojnë të kenë një karrierë të bujshme në futboll, por njëkohësisht edhe që të kenë motiv për të punuar shumë.
Ministri shtoi se Kozniku, por edhe shumë sportistë tjerë të gjeneratës së tij, si dhe tash sportistët e rinj dhe shumë të suksesshëm, janë kapitali më i madh që ka Kosova, e përmes të cilëve e paraqet para botës imazhin e vërtetë të vendit.
Duke parë se izolimi në sport po thyhet, Krasniqi tha se Kosova ka nevojë që të bashkojë të gjithë sportistët e suksesshëm, si ata të viteve ‘90, ashtu edhe futbollistët e rinj, për të kontribuar të gjithë për të çuar përpara sportin, futbollin në veçanti, dhe për të qenë një rrëfim i suksesshëm në rajon.
Kozniku falënderoi ministrin për pritjen, duke e përgëzuar për respektin që ka treguar për të gjithë futbollistët e suksesshëm shqiptarë, duke i takuar ata dhe duke mbajtur kontakte të vazhdueshme. Ai tha se është mjaft i lumtur që më në fund në sport ka hapa pozitivë, duke shtuar se është i gatshëm që në çdo rrethanë të japë kontributin e tij për të çuar përpara sportin në Kosovë.
Ardian Kozniku është një nga personalitetet me të respektuara në Kroaci. Ai kombëtares së Kroacisë, me paraqitjet dhe golat e tij, i ka ndihmuar të arrijë suksese të mëdha në garat evropiane e botërore. Kozniku ka qenë pjesë e gjeneratës së artë të Kroacisë, që në vitin 1998, në Kampionatin Botëror në futboll kishte marrë medaljen e bronztë.
Karrierën në futboll, Kozniku e ka nisur në Vëllaznim të Gjakovës, për të vazhduar më pas në Prishtinë. Në vitin 1990, ai iu bashkua skuadrës së njohur kroate, Hajduk nga Spliti. Më pas, ai ka luajtur edhe për skuadrat franceze Cannes, Le Havre dhe Bastia. Për dy vjet ai ka luajtur edhe për Dinamon e Zagrebit, ku tash punon si trajner i grupmoshave të reja.
