Arbër Ismajli apelon: Mbani distancën fizike, mbani maska mbrojtëse, dhe aplikoni masat e nevojshme higjienike

Gjilan – Në Gjilan, janë 12 raste të reja të konfirmuara mbrëmë nga Instituti Kombëtarë i Shëndetësisë Publike, ku të gjitha këto janë raste kontakti. Ekipet e përkujdesjes janë aktivizuar, dhe, janë në identifikim të plotë në gjetjen e rasteve potenciale të kontakteve. Përgjatë ditës së djeshme janë marrë 70 mostra të reja, ku pritet që sonte të dalin rezultatet nga ana e IKSHP-së. Ndërsa, edhe sot, janë marrë një numër i konsiderueshëm i mostrave tjera. Në total Komuna e Gjilanit i ka 119 raste me COVID19. Nga këto raste, kemi 2 të vdekur, 1 në hospitalizim në Klinikën Infektive, ndërsa, 46 raste janë në vetë-izolim, ndërsa 70 persona janë të shëruar plotësisht ka shkruar Arbër Ismajli.

“Një lutje e veçantë për të gjithë ata të cilët janë në pritje të testimeve, të qëndrojnë në shtëpi, sepse, mundësia potenciale e virusit tuaj, mund ta shumëfishojë atë në rast se dilni nga dera juaj. Pakujdesia shton rrezikun e përhapjes së infeksionit, dhe, mund të kemi pasoja të paparashikuara. Ju lutemi, që t’iu përmbaheni të gjitha rekomandimeve. Mbani distancën fizike, mbani maska mbrojtëse, dhe aplikoni masat e nevojshme higjienike” ka shkruar Ismajli./rajonipress/