Apel i rëndësishëm i kryeprokurorit Jetish Maloku

Gjilan – Apelojmë tek të gjithë qytetarët e Anamoravës t`i përmbahen masave që dalin nga Vendimet e Qeverisë së Kosovës, e që ka të bëjë me mbrojtjen e shëndetit të të gjithë qytetarëve të vendit nga epidemia, tani i njohur si COVI19, sëmundje kjo ngjitëse dhe me pasoja shëndetësore thuhet në apelin e kryeprokurorit Jetish Maloku.

Luten qytetarët të qëndrojnë larg tubimeve apo grupimeve që do kishte pasoja për gjithë shëndetin jo vetëm të atyre si pjesë e këtyre grumbullimeve, por edhe për familjen dhe rrethin më të gjerë.

Gjithashtu kërkojmë, mbajtjen mbyllur dhe jashtë çdo mundësie frekuentimi në lokalet e ndryshme hoteliere, restorante, bare apo lokale të kësaj natyre që do rrezikonin përhapjen e kësaj sëmundje ngjitëse me pasoja fatale.

Do të merren masa ligjore të ashpra deri në arrestim, të të gjithë atyre pronarëve që shkelin këto masa mbrojtëse të parapara me Vendimet e Qeverisë, që do të rrezikonin shëndetin e qytetarëve të paraparë edhe me dispozita ligjore të Kodit Penal të Kosovës.

Gjithashtu lusim të gjithë ata qytetarë të kthyer nga vende të ndryshme jashtë Kosovës e të sistemuar sipas listës së Ministrisë së Shëndetësisë, në të ashtuquajturën “Karantinë 14 ditor” t`i nënshtrohen këtij rekomandimi, konform masave të vendosura me Vendim të Qeverisë së Kosovës, me qëllim parandalimi të përhapjes së kësaj sëmundje ngjitëse tek njerëzit.

Sigurojmë se, institucionet e drejtësisë bashkë me ato të sigurisë janë dhe do jenë gjithnjë në mbështetje të çdo mase e rekomandimi në këtë gjendje të renduar në kohë epidemie, jo vetëm për rendin e sigurinë në Kosovë, por në mbarë rruzullin tokësor.

Do jemi afër çdo qytetari të vendit tonë duke besuar shumë se me mbështetjen dhe përkrahjen e tyre, pa panik e duke marrë masa mbrojtëse, do e kalojmë pa asnjë mëdyshje edhe këtë sfide për ne dhe gjithë njerëzimin thuhet në apelin e kryeprokurorit Jetish Maloku./rajonipress/