Ankohen pak konsumator

Vetëm 90 veta në krejt Kosovën gjatë këtij viti kanë kërkuar nga institucionet e shtetit mbrojtjen e të drejtave të tyre. Shumica e ankesave kanë të bëjnë me Rregullatorin e Ujësjellësit, KEK’un, faturimin e padrejtë apo mospërfillje të garancionit dhe skadim të afateve të produkteve të ndryshme. Arsyeja pse ka numër kaq të vogël të ankesave, sipas organizatave që i mbrojnë këto të drejta, është se qytetarët e kanë humbur besimin në institucione.

Ankohen për gjithçka. Për produkte, shërbime e shumë telashe që hasin në treg. Po të merren si statistikë e besueshme bisedat formale të kosovarëve, del se ushqimi që e konsumojnë dhe shërbimet në vend janë më të këqijat në gjithë botën.

Por, gjithë muhabetet e tyre duken jo serioze nëse shikohet sa ankesa i kanë bërë në adresën e duhur. Të dhënat tregojnë se konsumatorët nuk po i shfrytëzojnë sa duhet mekanizmat për mbrojtjen e të drejtave të tyre.

Organizatat që janë të thirrua të merren me këtë çështje thonë se qytetarët nuk kanë besim në institucionet vendëse se do t’u zgjidhet problemi.

Kjo edhe duket se ka bërë që vetëm 90 veta krejt këtë vit janë ankuar në Ministrinë e Tregtisë dhe Industrisë, në Departamentin për Mbrojtje të Konsumatorëve.

“Shumica e ankesave kanë të bëjnë me Rregullatorin e Ujësjellësit, KEK-un, skadim të afateve të produkteve të ndryshme, faturim i padrejtë apo mospërfillje të garancionit”, tregon Arta Istrefi, zyrtare për informim në MTI.

Sipas saj, numri i ankesave nuk është i kënaqshëm, përkundër fushatave të vazhdueshme për ngritjen e vetëdijes për mbrojtjen e konsumatorit, ndërsa ato raste të cilat kanë qenë të lidhura me Inspektoratin e Tregut, thotë se janë zgjidhur 100 për qind në favor të konsumatorit.

Me qëllim të ngritjes së vetëdijes së konsumatorit, të rritjes së raportimit për padrejtësitë që ata përballen në treg, Ministria e Tregtisë dhe Industrisë të hënën qytetarët i “bombardoi” me mesazhe në telefon.

“Konsumatorë, nëse gjatë blerjes së artikujve, shërbimeve përballesh me parregullsi në treg, ankohu falas në numrin 0800 – 11 000”, shkruan në mesazh.

Istrefi thotë se bazuar në raportimet e pakta që i marrin, vlerësojnë se duhet të punojnë më tepër për informimin konstant të qytetarëve për të drejtat e tyre.

“Çdonjëri nga ne jemi konsumator, prandaj nuk duhet të lejojmë që të drejtat tona të cenohen”, thotë ajo.

Në anën tjetër, kreu i organizatës për mbrojtjen e konsumatorëve “Konsumatori”, Selatin Kaçaniku, shprehet i pakënaqur me angazhimin e institucioneve në këtë drejtim.

Sipas tij, në mungesë të zbatimit të ligjit, qytetarët hezitojnë t’i raportojnë shkeljet e të drejtave të tyre, qoftë nga bizneset, qoftë nga institucionet.

Përveç kësaj, ai thotë se opinioni është i zhgënjyer me punën që bëjnë mekanizmat relevantë.

“Ata hezitojnë sepse asnjë institucion, asnjë asociacion nuk e ka bind konsumatorin për përformancë të mjaftueshme që me qenë i kënaqur me ta, edhe pse ai është taksapagues i këtyre institucioneve”, thotë Kaçaniku.

Ministria e Tregtisë dhe Industrisë, sipas tij, e ka për obligim t’i mbrojë konsumatorët me ligj, por këtë nuk është duke e bërë sa duhet.

Në MTI thonë se fushata për ngritjen e vetëdijes së konsumatorit, e filluar të hënën me SMS, nuk është e vetmja, por deri më tani janë mbajtur një mori ligjëratash në Universitetin e Prishtinës dhe në universitetet private. Nga viti i ardhshëm ata parashikojnë të mbajnë ligjërata edhe në shkollat e ulëta dhe të mesme me qëllim që çdo qytetar të jetë i informuar për të drejtat që i takojnë.(express)