Analistët: Pas refuzimit të LDK-së, Kurti mund të kthehet nga PDK-ja për formimin e qeverisë

Pas refuzimit që kryetari i Lidhjes Demokratike të Kosovës, Lumir Abdixhiku, i bëri ftesës së kryetarit të Lëvizjes Vetëvendosje, Albin Kurti, për një takim konsultativ për zgjedhjen e qeverisë së re, njohësit e rrethanave politike vlerësojnë se mandatari për formimin e qeverisë së re, duhet t’i kthejë sytë nga Partia Demokratike e Kosovës.

“Veprim i zgjuar i Vetëvendosjes të provoj një partneritet me Partinë Demokratike sepse nuk e ka provuar asnjëherë. Është partia e dytë më e madhe dhe rrjedhimisht do të krijonte një stabilitet në qeverisje, do ta zgjidhte edhe çështjen e presidentit, sepse këto dy parti së bashku bëjnë më shumë se 72 deputet, do të ishte veprim i zgjuar, por duhet pasur kujdes edhe termat mbi të cilët negociohet bashkëpunimi”, ka thënë për RTK-në Dritëro Arifi, njohës i proceseve politike.

E një tjetër njohës konsideron se PDK-ja është treguar konstruktive edhe në situata të tjera, kur ka bëhej fjalë për krijimin e institucioneve të reja në vend.

“Këtë konstuktivitetin ndër partitë politike në vend, më së miri e dëshmon Partia Demokratike e Kosovës, në qoftë se e shohim të kaluarën, që nuk ka qenë pengesë për PDK-në që të jap edhe pozitën e kryeministrit, prandaj është jo vështirë e mendueshme që diçka e tillë të bëhet edhe me LVV-në”, ka thënë Shkodran Rexhaj, njohësi i proceseve politike

Mundësinë për t’i dërguar një ftesë për takim PDK-së ose AAK-së e la të hapur këtë javë, zyrtarja e Vetëvendosjes, ministrja në detyrë e Drejtësisë, Albulena Haxhiu.

Edhe numri dy i Lëvizjes Vetëvendosje, Glauk Konjufca, bëri me dije se qeveria e re nuk mund të formohet pa bërë koalicion me ndonjërën prej partive opozitare, megjithatë qoftë PDK-ja, qoftë AAK-ja janë deklaruar të gatshme për një koalicion me parti të tjera opozitare, por jo edhe për një koalicion me Lëvizjen Vetëvendosje, që doli e para në zgjedhjet parlamentare të 9 shkurtit.