Ambasadori Malaj, i ftuar nderi në festën kombëtare të Zvicrës

Ambasadori i Kosovës është ftuar nga qyteti turisitik Torgon në kantonin Valais dhe nga qyteti Vernier në kantonin e Gjenevës.

Për nder të një gushtit, festë kombëtare të Zvicrës janë organizuar solemnitete në mbarë Zvicrën. Sipas traditës së këtij vendi, në kuader të shënimit të kësaj feste, ftohen personalitete të ndryshme nga jeta shoqërore-politike zvicerane për të mbajtur një fjalim.

Kësaj radhe ambasadori i Kosovës Naim Malaj, është ftuar nga qyteti turisitik Torgon në kantonin Valais dhe nga qyteti Vernier në kantonin e Gjenevës, thuhet në një njoftim të Ambasadës së Kosovës në Bernë.

Eshtë hera e parë që gjatë festës kombëtare të Zvcirës ftohet një ambasador i një vendi për të mbajtur një fjalim të tillë.

Lajmin për pjesëmarrjen e ambasadorit Malaj në qytetin Vernier e ka bërë të ditur edhe e përditshmja e Gjenevës “Tribune de Genève”.

Një gushti i këtij viti në qytetin Vernier është shënuar me Kosovën si mysafire nderi me muzikë dhe kuzhinë shqiptare.

Në fjalën e tij, Ambasadori Malaj ka vlerësuar lart vlerat e demokracisë zvicerane duke theksuar edhe kontributin e mërgates kosovare në zhvillimin ekonomik të Zvicrës, përfundon njoftimi për medie i Ambasadës së Kosovës në Bernë.