Aliu pret drejtuesit e AKP-së, në fokus bashkëpunimi për menaxhimin e pronave dhe projektet zhvillimore në Viti

Viti – Zëvendëskryetari i Komunës së Vitisë, Hasan Aliu, ka zhvilluar një takim pune me udhëheqësin e Divizionit të Zyrës Rajonale të Agjencisë Kosovare të Privatizimit (AKP) në Gjilan, Zeqirja Morina, ku u diskutuan çështje me rëndësi strategjike për administrimin e pronave dhe avancimin e bashkëpunimit ndërinstitucional.

Takimi u përqendrua në koordinimin e veprimeve ndërmjet Komunës së Vitisë dhe AKP-së për trajtimin e pronave të administruara nga kjo agjenci, me synim krijimin e kushteve më të favorshme për zhvillimin ekonomik lokal dhe menaxhimin sa më efikas të aseteve të ndërmarrjeve shoqërore.

Një pjesë e rëndësishme e diskutimeve iu kushtua statusit dhe perspektivës së pronave ku ushtrojnë veprimtarinë ndërmarrjet me interes publik KRU “Hidromorava” dhe “Eco Higjiena”, objektet e të cilave ndodhen në pronë të NSH “Agromorava”. Bashkëbiseduesit shqyrtuan mundësitë për gjetjen e zgjidhjeve institucionale që do të garantonin funksionimin normal të këtyre ndërmarrjeve dhe do të krijonin bazë për investime të mëtejshme.

Po ashtu, gjatë takimit u diskutua për forcimin e koordinimit institucional, shkëmbimin e informatave lidhur me çështjet pronësore, si dhe për projektet zhvillimore që kërkojnë bashkëpunim të ngushtë ndërmjet Komunës së Vitisë dhe Agjencisë Kosovare të Privatizimit. Vëmendje iu kushtua edhe aktiviteteve ekonomike që zhvillohen në pronat e administruara nga AKP-ja dhe mundësive për shfrytëzimin e tyre në funksion të zhvillimit lokal.

Të dyja palët u pajtuan se bashkëpunimi i vazhdueshëm institucional dhe koordinimi profesional janë elemente kyçe për zgjidhjen e çështjeve pronësore, krijimin e një mjedisi më të favorshëm për investime dhe mbështetjen e zhvillimit të qëndrueshëm ekonomik në Komunën e Vitisë./rajonipress/