Aliji kthehet me urgjencë te Baseli

Mbrojtësi “fringo” i kombëtares shqiptare, Naser Aliji, ka luajtur këtë kampionat si titullar, me kohë të plotë, në shtatë ndeshjet e kampionatit zviceran. Këtë periudhë e ka konsumuar si pjesë e Vaduzit, por aty ka qenë i huazuar.

Kumanovari, që debutoi me kuqezinjtë e De Biazit më 13 qershor, në miqësoren e fituar 1-0 ndaj Francës, në “Elbasan Arena”, është pronë e klubit të shumëfishtë kampion të Zvicrës, Bazelit.

Kësisoji, duke pasur të gjitha të drejtat mbi lojtarin, e ka kthyer mbrapsht atë nga huazimi. Kjo do të thotë se nga kjo fundjavë, Aliji do të jetë pjesë e Baselit, ku aktivizohen edhe dy kuqezinj të tjerë, Taulant Xhaka dhe Shkëlzen Gashi, transmeton Telesport. Mediat helvete bëjnë me dije se kampionët në fuqi të këtij vendi kanë vendosur ta ndërpresin në mënyrë të menjëhershme huazimin e mbrojtësit të majtë te Vaduzi.

Kujtojmë se Naser Aliji u huazua në janar te ky klub i Superligës Zvicerane, me qëllim që të kishte hapësira aktivizimi, të cilat nuk i munguan për asnjë moment. 21-vjeçari ka luajtur 630 minuta me Vaduzin në kampionatin e ri helvet, ndërkohë që ishte titullar edhe në eliminatoret e “Europa League”.

Aliji është një ish-lojtar i kombëtares së Zvicrës U-21, ndërkohë që vendopsi të përfaqësojë Shqipërinë, pas ftesës së trajnerit, Gianni De Biasit, në rang kombëtareje të madhe. Shkak për këtë rikthim të beftë dhe ndërprerjen e huazimit është bërë dëmtimi i Adama Traoré, mbrojtësit nga Bregu i Fildishtë i Baselit, kështu që klubi kampion duhej ta mbushte këtë boshllëk. Aliji është njeriu i duhur, edhe për faktin se është në pronësi të Baselit.