Alarm nga Gjilani: Infermierët ikin, institucionet heshtin

Gjilan – Rrëfimi tronditës i infermieres Albulena Hasani Mshica nuk është thjesht një histori personale largimi, por një akt-akuzë i drejtpërdrejtë ndaj neglizhencës institucionale dhe keqmenaxhimit lokal në Gjilan. Pas 12 vitesh shërbimi të pandërprerë në sistemin shëndetësor, ajo u detyrua të marrë rrugën e mërgimit, jo nga dëshira, por nga mungesa e kushteve elementare për një jetë dhe punë dinjitoze. Fenomeni i largimit të profesionistëve nuk është më statistikë, por dramë sociale që po zbraz qytetin nga kapitali më i vlefshëm, njeriu i ditur dhe i përkushtuar.

Ky rast nxjerr në pah një realitet të hidhur: profesionistë të përkushtuar, të trajnuar dhe me përvojë po largohen çdo ditë, ndërsa institucionet komunale, në vend që të reagojnë, vazhdojnë të heshtin.

Nën drejtimin e kryetarit Alban Hyseni, Komuna e Gjilanit po përballet me kritika të vazhdueshme për mungesë vizioni dhe dështim në krijimin e kushteve për ruajtjen e kuadrove profesionale, veçanërisht në sektorin jetik të shëndetësisë.

Hasani Mshica rrëfen për sakrifica që tejkalojnë çdo standard normal pune, shërbime në terren, përballje me pandeminë, kthim në punë vetëm katër ditë pas lindjes, një përkushtim që nuk u shpërblye as me një kontratë të qëndrueshme, as me siguri profesionale. Ky është një tregues alarmues se sistemi nuk po i mban ata që e mbajnë gjallë.

Fenomeni i largimit të profesionistëve nuk është më statistikë, por dramë sociale që po zbraz qytetin nga kapitali më i vlefshëm, njeriu i ditur dhe i përkushtuar. Ndërkohë që vendet evropiane ofrojnë kushte dhe vlerësim, institucionet vendore dështojnë të ofrojnë minimumin e dinjitetit profesional.

Nëse kjo qasje vazhdon, Gjilani rrezikon të mbetet pa kuadro cilësore, ndërsa pasojat do t’i ndjejnë drejtpërdrejt qytetarët. Heshtja institucionale përballë këtij realiteti nuk është më vetëm neglizhencë, është përgjegjësi që kërkon llogari./rajonipress/