Aksion kundër kontrabandës në Kamenicë, arrestohen pesë persona, sekuestrohen dru dhe mjete transporti

Kamenicë – Një operacion i zhvilluar nga organet e rendit në Kamenicë ka rezultuar me arrestimin e pesë personave të dyshuar për përfshirje në kontrabandë me mallra.

Sipas autoriteteve, pas hetimeve të realizuara, është konstatuar se të dyshuarit kanë transportuar në mënyrë të paligjshme dru teknik nga Serbia drejt territorit të Kosovës. Me urdhër të prokurorit kompetent, janë kryer bastisje në tri lokacione të ndryshme, ku janë gjetur dhe sekuestruar rreth 30 trupa dru teknikë, një sasi dërrasash, katër traktorë dhe një kamion, të cilët dyshohet se janë përdorur për realizimin e aktivitetit ilegal.

Me vendim të prokurorit, pesë të dyshuar meshkuj kosovarë janë arrestuar dhe dërguar në mbajtje, ndërsa hetimet për zbardhjen e plotë të rastit po vazhdojnë.

Autoritetet kanë theksuar se luftimi i kontrabandës mbetet prioritet, duke synuar mbrojtjen e tregut dhe zbatimin e ligjit në të gjithë territorin e vendit./rajonipress/