Aksion kundër evazionit fiskal në Gjilan dhe Viti, inspektohen 35 auto-parkingje

Gjilan – Drejtoria për Hetimin e Krimeve Ekonomike dhe Korrupsionit ka zhvilluar një aksion të koordinuar në Gjilan dhe Viti, në kuadër të luftës kundër shmangies nga tatimi dhe shkeljeve në veprimtaritë ekonomike.

Në bashkëpunim me Administratën Tatimore të Kosovës, Inspektoratin Qendror të Punës, Inspektoratin Qendror të Ministrisë së Tregtisë dhe nën koordinimin e Prokurorisë Themelore në Gjilan, janë inspektuar gjithsej 35 auto-parkingje.

Gjatë kontrolleve janë konstatuar shkelje të ndryshme ligjore dhe administrative, për të cilat kanë ndërmarrë veprime institucionet përgjegjëse sipas kompetencave të tyre. Autoritetet kanë bërë të ditur se aksione të tilla do të vazhdojnë me qëllim të forcimit të zbatimit të ligjit, luftimit të ekonomisë joformale dhe garantimit të konkurrencës së ndershme në treg./rajonipress/