Aksidente tragjike në Janinë, vdesin 4 shqiptarë e dy grekë

Tiranë – Gjashtë të vdekur është bilanci i viktimave të dy aksidenteve fatale në Janinë, ndër të cilët katër shtetas shqiptarë dhe dy grekë.

Të dy aksidentet janë regjistruar të shtunën. Aksidenti i parë ka ndodhur në aksin rrugor Janinë-Artë, ku një kamion, i cili drejtohej nga një shtetas shqiptar, është përplasur me një automjet që drejtohej nga një shtetas grek.

Si pasojë e përplasjes fatale kanë gjetur vdekjen e menjëhershme drejtuesit e dy automjeteve dhe një 11-vjeçare shqiptare, e cila udhëtonte me kamionin. Burime nga policia bëjnë të ditur se shkak për aksidentin është bërë parakalimi i gabuar i shtetasit grek. Ndërkaq, drejt spitalit janë dërguar në gjendje të rëndë shëndetësore edhe katër persona, udhëtarë në automjetet e përfshira në atë aksident, transmeton Top Channel.

Po në Janinë, në aksin rrugor Janinë-Kozanë, në afërsi të fshatit Lapsista, tre persona kanë gjetur vdekjen e menjëhershme si pasojë e përplasjes së dy automjeteve. Mësohet se viktimat janë drejtuesi i njërit prej mjeteve, një 23-vjeçar grek dhe një 49-vjeçare shqiptare, si dhe një fëmijë 2-vjeç nga automjeti tjetër.

Ndërsa nuk bëhen ende të ditur identitetet e viktimave dhe të plagosurve në aksidentet e mësipërme, policia ka nisur hetimet për zbardhjen e plotë të rrethanave dhe shkaqeve të aksidenteve.