Aksident fatal në Llabjan të Novobërdës, humb jetën këmbësori – arrestohen dy vozitës

Gjilan – Një aksident i rëndë trafiku me fatalitet ka ndodhur mbrëmjen e së premtes në fshatin Llabjan të Novobërdës, ku jetën e ka humbur një këmbësor.

Sipas Policisë së Kosovës, aksidenti ka ndodhur më 28 gusht 2026, rreth orës 22:08. Një vozitës mashkull kosovar, duke drejtuar automjetin, dyshohet se për shkak të pakujdesisë ka goditur një këmbësor mashkull kosovar.

Pas goditjes së parë, këmbësori është goditur edhe nga një automjet tjetër, i drejtuar po ashtu nga një mashkull kosovar.

Si pasojë e aksidentit, këmbësori ka ndërruar jetë. Me vendim të prokurorit, trupi i viktimës është dërguar në Institutin e Mjekësisë Ligjore (IML) për obduksion.

Ndërkohë, të dy vozitësit janë arrestuar dhe, me urdhër të organeve kompetente, janë dërguar në mbajtje. Rasti po trajtohet nga organet e drejtësisë./rajonipress/