Aksi rrugor Partesh – Viti në gjendje të mjerueshme, torturë e rëndë për vozitësit

Gjilan – Pluhur si të ishte në ndonjë kontinent tjetër Kosova, rruga ende e papërfunduar dhe e punuar keq e pa asnjë standard. Vozitësit që e frekuentojnë këtë rrugë ndihen në hall dhe në siklet të madh gjatë vozitjes.

Aksi rrugor nga Parteshi në drejtim të Kllokotit ende nuk ka përfunduar. Është larguar shtresa e asfaltit të vjetër dhe tani pluhuri të mbyt nëse qarkullon në këtë drejtim.

Ata që më së shumti ndihen në siklet janë vozitësit, po edhe ata që punojnë ose e frekuentojnë këtë rrugë.

Qytetarët ndërkaq akuzojnë Ministrinë e infrastrukturës e cila nuk po i mbikëqyrë as punimet e as kompanitë.
Murtezai një shofer taksie thotë se është e habitshme se si këto kompani punojnë kur të duan dhe ku të duan.

”Vetëm i nisin punimet dhe pastaj ikin. E kanë larguar asfaltin dhe pluhuri na mbyti, është një ferr i vërtetë derisa ta kalosh këtë rrugë nga pluhuri” shprehet ky qytetar.

Dauti vozitës i autobusëve privat thotë se kjo situatë është vërtet e patolerueshme dhe qesharake.
“Nuk e di kjo Qeveri a ka njerëz dhe staf me i përcjell punimet e punëkryesve. Ata po bëjnë hajgare me neve sepse po na torturojnë dhe po eksperimentojnë çdo ditë” shprehet me nervozizëm ky qytetar./rajonipress/