AKP-ja vendos për tërheqjen e aksioneve të “Grandit”

Bordi i Agjencisë Kosovare të Privatizimit e ka ekzekutuar vendimin për tërheqje të aksioneve të hotelit “Grand”. Tërheqja e aksioneve është bërë të enjten me arsyetimin se blerësit nuk i kanë plotësuar zotimet, shkruan sot Koha Ditore.

“Bordi i Drejtorëve, në takimin e të enjtes, me konsensus të plotë e fuqizoi vendimin për tërheqje të aksioneve, duke iu shmangur kështu lajthitjeve të vazhdueshme nga ana e poseduesit të kontratës ndaj institucionit publik të pavarur të themeluar nga ana e Kuvendit të Kosovës”, thuhet në komunikatën e lëshuar nga AKP-ja.

Vendimi i Bordit të AKP-së për tërheqje të aksioneve i ka irrituar blerësit e hotelit “Grand”, të cilët kanë bërë akuza në drejtim të AKP-së. Njëri nga ta ka thënë se i janë kërkuar 4 milionë euro ryshfet, për ta shpëtuar hotelin. Blerësit kanë paralajmëruar ankesa dhe padi kundër AKP-së.

Hoteli “Grand” në Prishtinë ishte privatizuar nga “Union Commerce” në vitin 2006 për një shumë prej 8 milionë e 160 mijë eurosh. Blerësi ishte zotuar se do t’i investojë 20 milionë e 200 mijë euro dhe se do t’i mbajë 570 punëtorë.

Fillimisht ishte prezantuar se blerësi i vetëm ishte Zylqef Berisha, kurse më vonë doli se hisedar aty janë edhe Behgjet Pacolli e Remzi Ejupi. Madje, për vite ishte nisur një proces gjyqësor pikërisht për pretenduesit e “Grandit”. Por, gjatë këtij viti, palët janë pajtuar për t’i ndarë aksionet në tri pjesë. Berisha dhe Pacolli kishin marrë nga 40 për qind të aksioneve, kurse Ejupi 20 për qind.