AGPK dënon kërcënimin e ekipit të Klan Kosovës

Asociacioni i Gazetarëve Profesionistë të Kosovës (AGPK) ka marrë me shqetësim një informacion lidhur me kërcënimin e gazetares së Klan Kosovës, Dafina Buqinca, dhe kameramanit Mirand Karamani, nga ana e dy zyrtarëve të lartë në Komunën e Lipjanit.

Drejtori i Arsimit në këtë komunë, Nazmi Krasniqi dhe Drejtori i shkollës së mesme Profesionale “Adem Gllavica”, Hajrush Stublla, kanë penguar ekipin në punën e tyre dhe i kanë mbyllur në zyrë gazetaren dhe kameramanin duke u bërë presion që ata të heqin dorë nga trajtimi i temës për të cilin kishin shkuar.

Keqtrajtimi ka vazhduar edhe kur gazetarja Dafina Buçinca ka kërkuar sqarim në Drejtorinë e Arsimit në Lipjan. Aty, drejtori Nazmi Krasniqi ka dashur ta godas gazetaren, kur ka menduar se sjellja e tij është xhiruar, duke thënë se ajo mund edhe të mos dal e gjallë nga zyra.

“Sjelljet e tilla janë të papranueshme dhe cenojnë rëndë lirinë e medias në kosovë. AGPK kërkon nga Policia e kosovës dhe gjykatat që të ndërmarrin masa ndaj atyre që pengojnë punën e gazetarëve. Sjelljet e tilla kriminale duhet të ndëshkohen”, thuhet në reagimin e AGPK-së. /Telegrafi/