Agollit i akordohet çmimi i “Carlo Levi”

Çmimi prestigjioz letrar “Carlo Levi” i është akorduar këtë vit shkrimtarit dhe poetit të njohur shqiptar, Dritëro Agolli, midis përfaqësuesve nga i gjithë Mesdheu.

Ceremonia e ndarjes së këtij çmimi do të jetë me 5 tetor në Aliani (Matera) në Itali, ku shkrimtari ka konfirmuar se do të jetë i pranishëm.

Agolli do të zhvillojë gjithashtu një takim me komunitetin shqiptar që jeton në këtë zonë të Italisë. Me kërkesën e emigrantëve shqiptarë është parashikuar një takim me shqiptarët e Altamurës (Bari), një zonë ku jetojnë rreth 5 mijë shqiptarë.

Ndërkohë, në tregun e botimeve pritet së shpejti një libër studimor voluminoz 700–faqesh për veprën e poetit me titull “Fjalor rimor i Dritëro Agollit”, me autor gjuhëtarin Mina Gero.