Agim Ramadani me veprën heroike nderoi Karadakun e Kosovën

Gjilan – Muhamet Ajrullahu nipi i Agim Ramadanit ka çdo vit që e viziton Kosharen, vendin ku Agim Ramadani dhe shokët e tij shkruan historinë, duke thyer kufirin dhe duke dëshmuar se s`ka asgjë më të shtrenjtë se sa liria. Agimi ynë me veprën e madhe që bëri u shndërrua në legjendë të gjallë sepse ai nderoi Karadakun, Zhegrën e tërë Kosovën thotë ai.

“Ndjehem pak i plogësht, sikur më tradhtojnë lotët dhe emocionet kur shkojë tek Kosharja e Agim Ramadanit, aty ku Agimi me shok luftoi me një ushtri e shtet kriminal, vetëm që gjeneratat e reja ta gëzojnë lirinë dhe të jenë të bashkuar andej e këndej kufirit”, kështu e nis rrëfimin e tij Muhamet Ajrullahu, ndryshe nipi i Agim Ramadanit.

Muhameti as edhe këtë vit nuk është ndalur dhe ka shkuar në Koshare për të përjetuar momente krenarie. “Agim Ramadani u bë legjendë e gjallë dhe u shndërrua në simbol të krenarisë për krejt Karadakun e Kosovën. Agimi thjeshtë u bë i pavdekshëm sepse i la të gjitha lukset që i kishte në perëndim dhe hyri në luftë. Andaj Agim Ramadanin e nderojnë dhe e respektojnë të gjithë shqiptarët kudo që ndodhen” shprehet Ajrullahu raporton rajonipress.

“A ka më mirë se të jesh pjesë e një historie ku thyhet kufiri shqiptaro – shqiptarë dhe a ka më mirë që të jesh protagonist i shkuljes së gurit ndarës që kishte shkaktuar vetëm dhunë e gjakderdhje për shqiptarët” shton Muhameti.

Muhamet Ajrullahu thotë se ndihet shumë krenar që pas luftës ka arritur të sensibilizojë në të gjitha format kontributin dhe veprën reale që e ka treguar Agimi.”Për kontributin e Agim Ramadanit ende ka nevojë të mbahen e organizohen tubime e debate shkencore sepse Agimi kishte dimensione të kalibrit të madh intelektual. Ai ishte edhe poet e krijues i mirëfilltë dhe profesionist e strateg i luftës e i veprimit” shton Ajrullahu.

Ajo çka e veçon një hero dhe një trim të pavdekshëm siç ishte Agimi, është bashkimi i çdo familje shqiptare sepse Agimi i bëri bashkë të gjitha ideologjitë e grupacionet dhe roli i tij është më shumë se historik sqaron Ajrullahu.

“Për mua Kosharja është heroike përherë dhe është krenaria e Kosovës, për çka duhet të studiohet e analizohet në detaje i tërë koncepti ushtarak që Agimi ka përfaqësuar dhe realizuar në këtë betejë”.

Ndryshe, Muhamet Ajrullahu ishte iniciatori dhe realizatori kryesor i projektit për vendosjen e shtatores së Agim Ramadanit në qendër të Gjilani dhe ka dhënë gjithçka nga vetja që figura e Agim Ramadanit të jetë e përfaqësuar denjësisht në jetën politike e publike të Kosovës. Dhe me dinjitet edhe kompania e tij mbanë emrin “AR – KATANA”.

Agim Ramadani ndryshe Muhamet Ajrullahun e quante edhe si “klyshi i dajës” për çka i kishte kushtuar edhe një shënim të cilën po e botojmë në tërësi.

Me mallin e para 25 viteve tu hodha në qafë, si atëherë kur të prisja pasdere i fshehur për me të befasuar!
Se ktheve kokën fare me më than “klyshi i Dajës” por unë e ndjeva zërin tënd thellë në shpirt ku fsheh dashurinë dhe mallin për ty !
Erdhe daja im i mirë, ashtu siç e meriton, me madhështi, Krenari e dashuri për atdheun që çmon luftën dhe sakrificën tënde!
Lavdi e përjetshme Sakrificës tënde, në çdo hap do të përpiqem të plotësoj ëndrrat, dëshirat dhe shpresën që Atdheu ta shijoj lirinë e merituar.
Me respekt dhe dashuri Nipi yt