Agim Ramadani kolos i madh i luftës për liri

Gjilan – Agim Ramadani ishte një kolos i madh i luftës për liri, në mesin e shumë kolosëve tjerë të kësaj lufte, emrin e të cilit e mban me nder kjo shkolle e madhe dhe e mirë në Zhegër. Kështu është shprehur Qemajl Mustafa në Zhegër në kuadër të manifestimit “Ditët e Agimit”, ku edhe është zbuluar busti i dëshmorit Agim Ramadani si dhe është kremtuar dita e shkollës, që mban emrin e tij.

Sipas Mustafës, Agimi dhe dëshmorët tjerë janë sinonim i lirisë, i demokracisë dhe i zhvillimit të vendit, sikurse edhe Idriz Seferi, të tjerët para tij dhe të tjerët pas tij, siç ishte Kadri Zeka, Nuhi Berisha, Avdullah Tahiri, Nushja dhe dëshmorët tjerë.

Ndërsa, Bujar Nevzati, drejtor komunal për Arsim, tha se nga sot shkolla dhe Agimi qëndrojnë më afër njëri-tjetrit. Busti i dëshmorit do të na kujtojë misionin tonë dhe të shkollës shqipe, secilit prej nesh, por edhe do të na qortojë sa herë që degradojmë në këtë mision dhe sa herë që detyrën për arsimimin dhe edukimin e brezit të ri e kuptojmë si punë të zakonshme.

Drejtori i shkollës, Sami Kadriu tha se mburren që mbajnë emrin e këtij heroi, që u bë figura më poliedrike në historinë më të re të Kosovës. Agimi thoshte se vdekja nuk është humbje, nëse bie për liri, ka nënvizuar Kadriu. Kurse Jashar Ramadani, vëlla i dëshmorit, kujtoi fjalët e Agimit, i cili thoshte se vetëm për dy minuta buzëqeshje të një fëmije në prag të shtëpisë, ia vlen të vdesësh.

Manifestimi ‘Ditët e Agimit’ është përmbyllur me programin muzikor “I këndojmë Agimit” ku kanë marrë pjesë këngëtarë të estradës dhe ansamble muzikore./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).