Agani: Do t’i mbështesim financiarisht 30 specializantë nga Presheva

Ministri i Shëndetësisë, Ferid Agani dhe Sekretari i Përgjithshëm, Gani Shabani pritën të hënën në takim kryetarin e Komunës së Preshevës, Ragmi Mustafa.

Në këtë takim, siç bën me dije MSH, u bisedua për realizimin e marrëveshjes së përkrahjes për funksionalizimin e maternitetit në komunën e Preshevës dhe për bashkëpunim e përkrahje edhe në aspekte të tjera të ngritjes së kuadrit profesional mjekësor për Luginën e Preshevës.

Agani e informoi kryetarin e Komunës së Preshevës edhe për programin e mbështetjes së specializantëve nga Lugina për shkollimin e tyre specialistik, me ç’rast gjatë këtij viti, “Ministria e Shëndetësisë do t’i mbështes financiarisht 30 specializantë të Luginës së Preshevës për vijimin e shkollimit spcialistik në Kosovë”, sipas programit të filluar më 2012.

Kryetari i Preshevës, Mustafa, e ka falënderuar Ministrin Agani dhe Ministrinë e Shëndetësisë për këtë vendim.