Afrim Shahini specialist i fitoreve

Gjilan – Shënues: Almedin Murati në minutën 54. Sa herë që largohen kryetrajnerët në KF Drita, ata për pak kohë i zëvendëson ndihmësi Afrim Shahini e sa herë që ky i fundit e ka udhëhequr ekipin e deri tashti ndodhi katër herë, gjithnjë Drita ka shënuar fitore. Drita – Llamkoso Kosova 1:0 (0:0)

Kështu ndodhi edhe këtë të premte, kur Afrim Shahini mori timonin nga i shkarkuari Agron Selmani dhe specialisti i fitoreve, Afrim Shahini, ia doli t’a mposht kampionin në fuqi Llamkos Kosovën, me rezultat 1:0. Është interesant e dhëna se nga tri fitore që Drita i ka shënuar në këtë kampionat, dy nga to i ka arritur ndaj Llamkos Kosovës, edhe atë me rezultat të njëjtë 1:0.

Ekipi vendas ka qenë bindshëm më i mirë se sa mysafirët, duke mos ua lejuar atyre asnjë rast, derisa vetë ka krijuar një mori rastesh, por që u konkretizua vetëm një prej tyre.

Në pjesën e parë, në minutën 26, Rexhepi ka gjuajtur nga largësia, por topi u përplas për tërthorëse. Nuk shkoi shumë e në minutën 32, Murati goditi furishëm, por në vend ishte Tahiri, që me gjuajtje të bukur shpëtoi golin. Nga pjesa e parë vlenë të përmendet edhe rasti në minutën 44, kur Gashi lëshoi një rast që nuk do të duhej huqur, ngase tërësisht i vetmuar e kërkoi këndin, por portieri Tahiri, ia arriti të shmang gol të sigurt. Llamkos Kosova, kampion në fuqi, nuk e pati asnjë rast të mirë në pjesën e parë e këtë vështirë e bëri edhe të dytën, ndërkohë që vendasit e shënuan fitoren nëpërmjet rastit në minutën 54, kur Almedin Murati ka dhënë një supergoditje nga largësia, duke gjuajtur me të majtën dhe ka qëlluar këndin e epërm të majtë të portierit mysafir.

Me këtë fitore, Drita ka ngelur në shumën e 12 pikëve, por që edhe më tej nuk mund të bëjë gjumë të rehatshëm sa i përket luftës për mbijetesë në elitën e futbollit kosovar, derisa mysafirët, që po vazhdojnë të luajnë edhe më tej pa paga, kanë ngelur në kuotën e 17 pikëve, duke mbajtur mesin e tabelës.

Thanë pas ndeshjes:

Afrim Shahini: “Ndeshja e katërt që po e udhëheq dhe kam po aq fitore, Djemtë luftuan për çdo top. U kthye motivi për ne. Do të mundohemi që edhe në të ardhmen të mbledhim pikë. Fitorja ishte e duhur. Mysafirëve nuk u lamq asnjë rast e ne patëm shumë më tepër nga loja. Jemi të përgatitur edhe për ndeshjet që na kanë mbetur”

Ismet Munishi (Llamkos Kosova): “Drita luftoi me një ekip të ri, ditën të luajnë. Ne luajtëm dobët në pjesën e parë , në të dytën më mirë, por humbëm me meritë. Kemi probleme në mesfushë, në sulm e në gjërat elementare. Treguam se nuk jemi të gatshëm t’a mundim Dritën. U vërejt mungesa e Statovcit, që po na mungon shumë”

Stadiumi i Qytetit në Gjilan. Shikues: 400. Arbitra; Baliu, Preniqi, Hyseni. Shënues: Almedin Murati në minutën 54. Kartoni verdhë: Rexhepi, Tusuni – Osmani, Veseli.

Drita: Huruglica, Baxhuku, Tusuni, Syla, Limani, Murati, Sermaxhaj (Ajdari), Rexhepi, Gashi (Kelmendi), Haliti, Berisha.

Llamkos Kosova: Tahiri, Prekazi, Veseli, Ramadani, (Hasani), Izmaku, Shala, Veseli (Zabërxha), Gërxhaliu (Osmani), Shabani, Ahmeti, Dragusha./rajonipress/