Afrim Myrtaj, trupi i plagosur i Lirisë, shpirti i pamposhtur i Kosovës

Gjilan – Afrim Myrtaj nga Gjilani është një nga ata bij të rrallë të Kosovës, mbi supet dhe në trupin e të cilëve u shkrua liria. Një nga pjesëtarët e parë të Ushtrisë Çlirimtare të Kosovës, ai përfaqëson figurën e luftëtarit stoik që i mbijetoi vdekjes, por kurrë nuk iu dorëzua armikut. Ka njerëz që historinë e Kosovës nuk e lexojnë në libra, por e mbajnë të gdhendur në trup. Afrim Myrtaj është njëri prej tyre. Një nga pjesëtarët e parë të Ushtrisë Çlirimtare të Kosovës, luftëtar që i mbijetoi vdekjes më shumë se një herë, ai është dëshmia e gjallë e çmimit të lirisë. Me trupin e shpuar nga mbi njëmbëdhjetë plumba dhe me shpirtin të pathyer, Myrtaj përfaqëson gjeneratën e atyre që nuk u tërhoqën as para rafaleve të mitralozëve, as para makinerisë vrastare të regjimit serb.

Në historinë e luftës çlirimtare, emri i tij qëndron jo vetëm si simbol guximi, por si dëshmi e gjallë se liria e Kosovës u fitua nga njerëz që ishin të gatshëm të paguanin gjithçka, edhe me jetën.

Në historinë e luftës çlirimtare shqiptare, shtati i Afrim Myrtajt zë një vend të veçantë, mbi 11 herë i goditur nga plumbat e armikut, ai qëndroi në këmbë, përballoi rafalet e mitralozëve dhe i mbijetoi një makinerie vrastare që synonte zhdukjen e shqiptarëve nga trojet e tyre. Plagët në trupin e tij janë plagë të lirisë, dëshmi e gjallë e çmimit që u pagua për çlirimin e Kosovës.

Afrim Myrtaj është një nga emrat emblemë të luftës së armatosur të UÇK-së, veçanërisht në Zonën Operative të Karadakut, ku guximi, besimi dhe vetëmohimi i tij u shndërruan në shembull frymëzimi për shokët e armës. Ai i dha luftës për liri gjakun, trupin dhe jetën e tij, pa kursyer asgjë për çlirimin e atdheut nga regjimi pushtues serb.

Heroizmi i tij nuk është mit, por fakt: plagë përpara, plagë prapa, plagë anash – shenja të një përballjeje ballë për ballë me armikun, të një njeriu që nuk u tërhoq, nuk u thye dhe nuk u dorëzua. Të gjithë, të mëdhenj e të vegjël, duhet ta dinë se ku dhe sa plagë mban në trup heroi i gjallë i Kosovës, Afrim Myrtaj.

I lindur dhe rritur në një familje intelektuale dhe thellësisht patriotike, Afrimi u edukua me ndjenjën e sakrificës për atdheun. Kur shpresa e shqiptarëve po shuhej nën represionin serb, ai zgjodhi rrugën më të vështirë, por më të ndershme: iu bashkua shokëve të armës për t’i prerë rrugën një regjimi kriminal dhe për t’i dalë zot vendit të vet. Ishte ndër të parët që e përqafoi rreshtimin në UÇK, me bindjen se liria nuk dhurohet, por fitohet.

Gjatë luftimeve të ashpra, në pritën e drejtpërdrejtë nga forcat serbe, Afrim Myrtaj u plagos rëndë, duke marrë 11 plumba në trup.

Në ofensivën e Zhegovcit, ai ishte pranë dëshmorit Pajazit Ahmeti, i cili ra heroikisht nën breshërinë e armikut. “Kam qenë afër Pajazit Ahmetit kur ramë në pritë. Ata shtinë menjëherë dhe unë mora nëntë plumba në trup, ndërsa Pajaziti vdiq në vend, i goditur mizorisht”, rrëfen Afrimi, duke dëshmuar një nga faqet më të dhimbshme dhe më heroike të luftës.

Sipas tij, ofensiva e Zhegovcit nisi më 15 prill 1999, rreth orës 10:00 paradite. Edhe pse i plagosur rëndë, ai arriti të vetëmbrohej, të largohej dhe të shpëtonte, duke i mbijetuar vdekjes për të dëshmuar të vërtetën dhe sakrificën e bashkëluftëtarëve të tij.

“Luftën nuk e kam përkrahur kurrë si qëllim, por vetëm si mjet për paqe”, shprehet Afrim Myrtaj. “Ia dola t’i dal zot vendit dhe popullit tim.” Lufta e tij, së bashku me shokët e UÇK-së, mbetet një nga periudhat më të lavdishme të historisë sonë kombëtare, një epokë guximi dhe vetëmohimi përballë ushtrisë, paramilitarëve dhe makinerisë shtetërore serbo-sllave.

Sot, Afrim Myrtaj shërben si polic në Njësitin e Hetimeve Kriminale në Gjilan, duke vazhduar t’i shërbejë vendit me të njëjtin përkushtim, ndershmëri dhe përgjegjësi. Nga fronti i luftës në frontin e rendit dhe ligjit, ai mbetet simbol i shërbimit ndaj atdheut.

Afrim Myrtaj nuk është vetëm dëshmitar i historisë, ai është historia e gjallë e Kosovës, një trup i plagosur për liri dhe një shpirt që kurrë nuk u nënshtrua./rajonipress/