Adnan Januzaj rikthehet në stërvitje me Sevillan, por e ardhmja mbetet e paqartë pas interesimit të Anderlecht

Sevilla ka nisur përgatitjet për sezonin e ri 2025/26 nën drejtimin e trajnerit të ri, Matias Almeyda, dhe në stërvitjen e parë të zhvilluar të dielën ishte i pranishëm edhe Adnan Januzaj. Megjithatë, e ardhmja e futbollistit shqiptar mbetet në dyshim.

Sipas mediave spanjolle, klubi andaluzian i ka dhënë dritën jeshile Januzajt për t’u larguar, pavarësisht se ai është ende nën kontratë deri në verën e vitit 2026.

30-vjeçari, që aktualisht është lojtari më i paguar në skuadër, nuk është pjesë e planeve të Almeydas për sezonin e ardhshëm.

Januzaj ishte huazuar te Las Palmas gjatë sezonit të kaluar, ku në 18 paraqitje në La Liga regjistroi dy gola dhe një asistim.

Në Belgjikë, Anderlecht – klubi ku Januzaj e nisi karrierën si i ri – raportohet të jetë i interesuar për një rikthim të mundshëm të tij. Klubi nga Brukseli aktualisht drejtohet nga Besnik Hasi.

E ardhmja e Januzajt pritet të qartësohet gjatë javëve në vijim, teksa Sevilla dhe lojtari do të diskutojnë mundësitë për një transferim të ri. /Telegrafi/