Adnan Januzaj, lojtari i muajit te Manchester United

Manchester – Futbollisti Adnan Januzaj është shpallur lojtari më i mirë i ekipit Manchester United për muajin tetor. Talenti i madh 18 vjeçar ka grumbulluar 42 për qind të votave të tifozëve të Manchester United për të mposhtur konkurrencën e Wayne Rooneyt (34%) dhe David De Gea (24%).

Çmimi e kompleton muajin fantastik për Adnanin, i cili shënoi dy gola në fitoren ndaj Sunderlandit dhe nënshkroi kontratën e re me kampionin e Anglisë. “Unë jam shumë i kënaqur që e fitova këtë çmim, sidomos pasi është votuar nga fansat, të cilët më kanë përkrahur shumë”, raporton Telegrafi.

“Është mirë që të shpërblehesh për performansat e tua në fushë dhe të kuptosh se duhet të punosh ende e të përparosh si lojtar. Unë do të tentoj t’i kontribuoj ekipit pa marrë parasysh vendin dhe kohën”, ka deklaruar Januzaj.

Çmimi fitohet nga votat e tifozëve të Manchester United në Twitter dhe në tri versionet (gjuhët) e ueb faqes zyrtare, ManUtd.com. Klubi nga Old Trafford me rastin e fitimit të këtij çmimi do të bëj një donacion prej 500 funta për ndonjë organizatë bamirëse të cilën e zgjedh Adnani.