Abdixhiku: Fitorja e CDU-së në Gjermani, një mundësi e re për Kosovën

Kryetari i Lidhjes Demokratike të Kosovës (LDK), Lumir Abdixhiku, ka përshëndetur fitoren e partisë kristiandemokrate CDU në zgjedhjet në Gjermani, duke e konsideruar këtë si një lajm të mirë për Kosovën.

“Ditë e rëndësishme për Gjermaninë; mundësi e re për Kosovën. Fitorja e Friedrich Merz dhe e CDU-së, është një dritare e re për Republikën tonë”, ka shkruar Abdixhiku në një postim në rrjetet sociale.

Ai ka bërë të ditur se tashmë ka përcjellë urimet e tij për kryetarin e CDU-së, Friedrich Merz, dhe për miqtë e tij në këtë parti gjermane.

“Në çdo takim të deritanishëm me kancelarin e ardhshëm gjerman, kam marrë gjithmonë mbështetje për Republikën tonë, për Lidhjen Demokratike të Kosovës. Ai i njeh mirë rrugëtimet tona, ai i mbështet mirë qëllimet tona”, ka shtuar ai.

Sipas Abdixhikut, fitorja e CDU-së dhe fuqizimi i së djathtës evropiane përbën një shpresë të re për Kosovën në arenën ndërkombëtare.