AAB Prishtina fituese e turneut ndërkombëtar në Gjilan

Gjilan – Klubi i volejbollit AAB Prishtina, në konkurrencën e femrave është fituese e turneut ndërkombëtar që u mbajt të dielën në Gjilan.

Ky turne është organizuar nga klubi i njohur në Kosovë, KV Drita në bashkëpunim me Drejtorinë për Rini, Kulturë dhe Sport në Gjilanit për nder të 5 vjetorit të Pavarësisë së Kosovës.

KV Forshped nga Velesi i Maqedonisë, KV Skenderaj i fuzionuar me ekipin KV Kastriotit, nderuan këtë turne që mëtohet të jetë tradicionale. Këtë turne të karakterit ndërkombëtar e hapi Drejtori i Drejtorisë për Kulturë, Rini dhe Sport në Komunën e Gjilanit, Veton Nevzadi, që njëhërit edhe e kishte mbështetur këtë turne.

Ne gjysmëfinalen e parë u përballen KV Forsped me Skenderajn. Pa ndonjë mund të madh mysafiret nga Velesi i Maqedonisë shkuan ne finale duke mposhtur KV Skenderajn me rezultat 2:0 në sete. Ndërkohë, në gjysmëfinalen e dytë u përballen KV Drita kundër KV AAB Prishtina.

Mysafiret nga Prishtina të përforcuara në afatin kalimtar me dy bullgare Irena Mishonova dhe Ilijana Dimcheva, si dhe me potencialin e sezonit të kaluar, treguan një lojë shumë të bukur kundër gjilanasve duke e fituar këtë ndeshje me rezultat 2:0 në sete.

Ndërkaq, në ndeshjen për vendin e tretë ndërmjet KV Drita dhe Skenderaj, nikoqirët u treguan më të mirë se mysafiret nga Skenderaj duke triumfuar me rezultat 2:0 ne sete. Ky turne që u përmbyll me finalen e bukur në mes KV AAB Prishtina dhe Forshped Volley.
Finalja është zhvilluar në një atmosferë të bukur sportive dhe mjaft interesante. AAB u desh të djersitët goxha shumë për ta fituar sfidën ndaj ekipit nga Maqedonia.

Volejbollistet e të dy skuadrave treguan vërtet një lojë të madh dhe dramatike. Finalja u zhvillua në pesë sete, pasi që i gjithë takimi ishte i baraspeshuar, ndërsa në setin e pestë dhe të fundit ishin vashat e Naser Krasniqit, ato që fituan këtë finale të madhe./rajonipress/