A po shkon deputeti Slobodan Petrović, me retorikën e tij ndaj Kosovës dhe me nxitjen e tensioneve ndëretnike, në rrugën e Slobodan Miloševićit? Unë mendoj se po!

Nga Kujtim Sadriu – Si qytetar i Republikës së Serbisë, dëshiroj t’i drejtoj një pyetje deputetit Slobodan Petrović.

A mendoni se pjesëmarrësit e ngjarjeve të 5 tetorit 2000 duhet të konsiderohen terroristë, sepse rrëzuan pushtetin e diktatorit të fundit në Evropë, Slobodan Miloševićit? Nëse ata janë terroristë, atëherë, sipas së njëjtës logjikë, terroristë janë edhe ish-pjesëtarët e UÇPMB-së.

Në qasjen e tij, Slobodan Petrović i ka dënuar pjesëtarët e MPB-së që nuk morën pjesë në luftën në Kosovë, duke i quajtur dezertorë. Me këtë ai mbështet luftën dhe spastrimin etnik që erdhën si pasojë e politikës së Slobodan Miloševićit. Atëherë shtrohet pyetja: a është ky një Slobodan i ri, si ai Miloševići?

Për këto çështje duhet të flitet me përgjegjësi, duke respektuar faktet, ligjin dhe dinjitetin e të gjithë qytetarëve.

Me deklaratat e tij, zoti Petrović në çdo seancë shkakton tensione në jug të Serbisë, duke përdorur retorikë tendencioze dhe provokuese, vetëm që të krijojë destabilizim ndërmjet komuniteteve etnike në Preshevë dhe Bujanoc.

Prandaj, para së gjithash, i bëj thirrje deputetit Shaip Kamberi dhe aktorëve të tjerë politikë që të reagojnë ndaj këtyre deklaratave dhe të shprehen qartë për to, me qëllim që të parandalohet rritja e mëtejshme e tensioneve ndëretnike.

Gjithashtu, u bëj thirrje organeve kompetente shtetërore që, nëse vlerësojnë se ekzistojnë baza ligjore, të ndërmarrin masat përkatëse për ruajtjen e rendit publik, sigurisë dhe parandalimin e tensioneve ndëretnike në jug të Serbisë. Po ashtu, është e rëndësishme të hetohet financimi i kësaj retorike, e cila rikthen frymën e viteve ’90. Këto janë çështje serioze për ruajtjen e paqes dhe stabilitetit.

I bëj thirrje Ambasadës së Shteteve të Bashkuara të Amerikës, ambasadave të vendeve të Bashkimit Evropian dhe Delegacionit të Bashkimit Evropian në Serbi që të ndjekin deklaratat publike të Slobodan Petrovićit dhe aktorëve të tjerë politikë dhe të reagojnë, në përputhje me kompetencat e tyre, nëse vlerësojnë se deklarata të caktuara nxisin ndarje ose tensione.

Nuk duhet lejuar që një njeri që nuk zgjedh mjetet për të arritur pushtetin të vijë në pushtet dhe të na kthejë në vitet ’90.