A duhet të largohet Shaqiri nga Bayerni? Përgjigjet Hitzfeld

Ish trajneri i Përfaqësueses së Zvicrës, Ottmar Hitzfeld, e ka këshilluar Xherdan Shaqirin që të mbetet në Bayern Munich dhe të luftoj për një vend në formacionin e Pep Guardiolas.

Gjithnjë e më shumë po flitet rreth largimit të Xherdan Shaqirit nga Bayern Munichu, pasi nuk po gjen vend në formacionin kryesor të Pep Guardiolas.

Megjithëkëtë, ish trajneri i Bayern Munichut dhe Përfaqësueses së Zvicrës, Ottmar Hitzfeld i sugjeron Shaqirit të ketë durim. Ai e njeh shumë mirë futbollistin, që e kishte armë kryesore te ekipi helvetik. Andaj, thotë se reprezentuesi zviceran i ka të gjitha kualitet për të luajtur si titullarë në Bayern Munich.

“Shaqiri duhet të vazhdojë të luftojë në Bayern Munich. Është një futbollist kualitativ dhe profesionist. Andaj, ai duhet ta pranojë realitetin, të ballafaqohet me sfidën dhe ta respektojë kontratën me klubin”, ka deklaruar Hitzfeld për “abendzeitung.de”.

Sipas tij, Shaqiri mund të bëhet shumë i rëndësishëm për Pep Guardiolan. “Ende është i ri dhe mund të konsiderohet e ardhmja e klubit. Nëse fillon ta fitojë besimin e trajnerit, mund të bëhet shumë i rëndësishëm edhe për Bayernin”, ka theksuar ish përzgjedhësi i Zvicrës.