Grabovci paralajmëron zhvillime të reja

Kur kanë mbetur edhe katër ditë deri në mbajtjen e seancës së Kuvendit të Kosovës, vazhdon të mbetet enigmë nëse PDK-ja do t’ia dalë të sigurojë numrat për të zgjedhur kryeparlamentarin nga radhët e saj e më pastaj edhe të fitojë mandatin për krijimin e qeverisë.

Pavarësisht faktit se koalicioni paszgjedhor LDK-AAK-NISMA vazhdon të këmbëngulë se nuk do të lëshojnë pe dhe se ata do të krijojnë institucionet, në PDK janë optimistë se deri të premten, kur mbahet seanca e Kuvendit, gjërat do të ndryshojnë në favor të tyre.

Nënkryetari i PDK-së, Adem Grabovci, në një prononcim për Telegrafin, ka theksuar se “shumë shpejt do të ketë lajme të reja”, por pa bërë të ditur asgjë konkrete.

Në anën tjetër, nënkryetari tjetër i PDK-së, Memli Krasniqi, ka deklaruar në media se “presim të votohet Kryeparlamentari i PDK-së ashtu siç parashihet në Kushtetutë dhe në vendimin e Gjykatës Kushtetuese”.

“Mirëpo, deri më tash s’kemi biseduar me asnjë parti politike pasi dihet pozicioni i tyre bllokues edhe ndaj formimit të institucioneve. Si fituese, PDK është e gatshme edhe për zgjedhje të reja”, ka thënë Krasniqi, transmeton Telegrafi.

Kryesuesja e seancës së Kuvendit të Kosovës dhe anëtarja e kryesisë së PDK-së, Flora Brovina, tha se seanca e 12 shtatorit do të jetë e vështirë.

Ndryshe, pas takimit të sotëm (të hënës) ndërmjet liderëve të partive të Bllokut, LDK-AAK-NISMA, është bërë e ditur se ende nuk është arritur ndonjë marrëveshje me Lëvizjen Vetëvendosje.

Isa Mustafa, kryetar i LDK-së ka thënë se nëse do të arrihej një marrëveshje me VV-në do të ishte marrëveshje parimesh dhe jo ndonjë marrëveshje e plotësimit të kushteve të njërës ose tjetrës palë.

“Nuk kemi kushte nga Vetëvendosja. Ne kemi diskutuar për parime dhe deri tani i kemi përafruar qëndrimet për të cilat po punohet që të shkohet edhe më tutje”, ka thënë Mustafa./Telegrafi/