Anëtarësimi në KE, synohet brenda vitit

Edhe pse Kosova i ka votat për t’u bërë pjesë e Këshillit të Evropës, ende mbetet jashtë këtij institucioni të rëndësishëm evropian. Ishte premtuar kohë më parë që anëtarësimi në këtë mekanizëm do të ndodhë shpejt, mirëpo vendi edhe pas 6 vjetësh të pavarësimit mbetet pa përfaqësues në këtë këshill.

Ish-anëtarja e Komisionit parlamentar për Punë të Jashtme nga radhët e Lidhjes Demokratike të Kosovës, Vjosa Osmani, ka deklaruar për Tribunën se Kosova tashmë ka votat e mjaftueshme për t’u bërë pjesë e këtij institucioni, por hapin për aplikim nuk po e bën qeveria aktuale.

“Republika e Kosovës i ka votat e duhura për anëtarësim në Këshillin e Evropës, respektivisht i ka mbi 2/3 e votave të organit ekzekutiv të këtij institucioni – Këshillit të Ministrave”, ka thënë Osmani. Sipas saj, në momentin kur koalicioni LAN të marrë qeverisjen e vendit në dorë, çështja e anëtarësimit në Këshill të Evropës do të ketë tjetër trajtim.

“Qeveria e Kosovës dhe MPJ patën premtuar që në vitin 2011 se do ta anëtarësojnë Kosovës në KE, por tani pas tri viteve gjendja pothuajse nuk ka ndryshuar fare. Për koalicioni LAN, anëtarësimin në KE do të jetë prioritet i politikës së jashtme shumëpalëshe dhe besoj se me një angazhim të duhur këtë synim do të arrijmë brenda një kohe të shkurtër”, ka thënë Osmani…(Tribuna).