Haziri: Do ta kemi kryetarin dhe nënkryetarin e Kuvendit të Kosovës

Me 84 vota për, gjashtë abstenime dhe asnjë votë kundër, anëtarët e Këshillit të Përgjithshëm të LDK-së e kanë miratuar koalicionin pas zgjedhor LDK-AAK-Nisma.
Anëtari i Kryesisë së LDK-së, Lutfi Haziri, thotë se në rastin e abstenimeve respekton qëndrimet e kolegëve të partisë.

“Por, shumica absolute e kanë mbështetur koalicionin si akt politik dhe rrugën politike që ka me kalu LDK prej sot e deri në konstituimin e Kuvendit”, ka thënë Haziri në emisionin Argument Plus në RTV21.

I pyetur për deklaratat e disa deputetëve të LDK-së që nuk janë deklaruar të entuziazmuar për koalicionin, Haziri shton: “Shumica e madhe e LDK-së nuk janë të entuziazmuar me marrëveshje, se ne e kemi nominuar për kryeministër Isa Mustafën. Por, tash jemi pajtuar për koalicionin e shpresës”.

Haziri thotë se LDK do ta ketë kryetarin dhe nënkryetarin e Kuvendit të Kosovës, ndërsa shton se ka përafrime të qëndrimeveve me Lëvizjen Vetëvendosje.

“Grupet tona punuese që janë formuar dje, do të punojnë në parimet si dialogu dhe privatizmi, si dhe orientimet e përbashkëta për qeverisja të mirë”, tha ai. /Telegrafi/