Ambasada amerikane: Presim të bashkëpunojmë me Qeverinë e re

Ambasada Amerikane ka bërë një deklaratë për procesin e djeshëm zgjedhor ku thuhet se në bazë të raporteve të para zgjedhjet ishin të besueshme dhe në përputhje me standardet ndërkombëtare.

Më poshtë mund të lexoni të plotë deklaratën:

DEKLARATË E AMBASADËS AMERIKANE NË PRISHTINË

Ambasada amerikane përshëndet të gjithë votuesit të cilët shkuan dje në vendvotime për tu siguruar që zëri i tyre është dëgjuar në procesin demokratik të Kosovës. Ambasada është e inkurajuar nga raportet e para të cilat tregojnë që zgjedhjet e së dieles ishin në masë të madhë të besueshme dhe në përputhshmëri me standardet ndërkombëtare. Presim bashkëpunim me qeverinë e re në çështjet kyqe të cilat do të ndihmojnë në avancimin e aspiratave Euro-Atlantike të Kosovës.

Raportet e mediave dhe shoqërisë civile Kosovare, së bashku me raportet e ekipeve tona vëzhguese të ambasadës tregojnë që autoritetet Kosovare iu përgjigjën me përpikëri raporteve të kohëpaskohshme lidhur me parregullsi dhe manipulime të supozuar zgjedhore. Jemi duke i vëzhguar këto raporte nga afër dhe vazhdojmë të jemi të sigurt që KQZ, Policia e Kosovës dhe zyra e Prokurorit të Shtetit do të vazhdojnë partneritetin e tyre pozitiv për të siguruar që të gjitha incidentet janë hetuar rrënjësisht dhe janë zgjedhur sipas ligjeve Kosovare.

Ambasada vlerëson punën e zellshme të OSCE, EULEX dhe KFOR të cilët siguruan që secili qytetarë të mund të votojë në zgjedhjet e sigurta. Gjithashtu, presim të shqyrtojmë raportin fillestar vlerësues të Misionit Vëzhgues Zgjedhorë të Bashkimit Europian.

Duke ndërtuar mbi suksesin e votimit të vitit të kaluar, zgjedhjet e djeshme edhe më tej vërtetuan se Kosova është plotësisht e aftë që të mbajë zgjedhje korrekte dhe transparente të cilat përmbushin standardet ndërkombëtare. Mbesim të inkurajuar nga përpjekjet individuale për ti shprehur të drejtat e tyre demokratike qoftë duke votuar për herë të parë apo duke e siguruar besueshmërinë e procesit. Fuqia e Kosovës qëndron në pjesëmarrjen dhe integrimin e plotë të të gjithë qytetarëve të Kosovës për të arritur një të ardhme më të begatë.

Çmojmë punën e zellshme të autoriteteve Kosovare, shoqërisë civile, mediave dhe partive politike ku secili dha kontributin jetik për suksesin e djeshëm. Më me rëndësi, përgëzojmë qytetarët e Kosovës që vendi i tyre i ri vazhdon të marrë hapa dramatik për ta çuar më tej zhvillimin e saj demokratik dhe aspiratat Europiane.