Mustafa: LDK, listën nuk e ka bërë me “konsulta” jashtë partisë

Kryetari i Lidhjes Demokratike të Kosovës, ka reaguar pasi që, siç ka thënë ai “Fatmir Sejdiu, ka reaguar pse, gjoja, i është përmendur emri në kontest të përgatitjeve të LDK-së për zgjedhjet e 8 qershorit, me theks të veçantë në procesin e përpilimit të listës së kandidatëve për deputetë”.

“Më lejoni të saktësoj se në asnjë rast nuk kam theksuar se z. Sejdiu është konsultuar lidhur me listën e kandidatëve të LDK-së për deputetë të Kuvendit të Kosovës. Por, kam theksuar, duke thënë të vërtetën e pamohueshme, se unë, si kryetar i LDK-së, i kam kërkuar z.Sejdiu mendimin për përfshirjen e tij në listën e kandidatëve të LDK-së për deputetë”, ka bërë të ditur Mustafa.

Sipas tij, kjo është bërë me qëllimin më të mirë, në respekt njerëzor dhe për shkak të kontributit të tij në LDK dhe si përfaqësues i LDK-së në institucionet e Kosovës.

“LDK-ja, ashtu siç e thotë edhe Statuti i saj, listën e kandidatëve për deputetë nuk e ka bërë duke zhvilluar ‘konsulta’ jashtë strukturave partiake, por e ka miratuar në Kryesinë e LDK-së dhe në Këshillin e Përgjithshëm të LDK-së, me unanimitet të plotë, pasi paraprakisht kishte marrë propozimet nga strukturat lokale të LDK-së”, thuhet në një komunikatë të nënshkruar nga Isa Mustafa. /Telegrafi/