Ministri Buja u “ofron” gabime gjuhësore maturantëve

Të gjithë maturantëve të Kosovës po u shpërndahet nga një broshurë, ku u bëhet me dije atyre se dita kur do t’i nënshtrohen testit të maturës është afër.

Broshurën e hap një fjalë e ministrit të Arsimit, Shkencës dhe Teknologjisë, Ramë Buja. Por me një gabim të pafalshëm gjuhësor për të parin e arsimit në vend.

Në vend të “afrohet”, ministri Buja u thotë maturantëve se “Provimi i maturës shtetërore tashmë po ‘ofrohet’….”.
Veç kësaj, fjala e tij ka edhe disa probleme me shkronjat e mëdha brenda fjalive, transmeton Koha.net.

Ndryshe, në Fjalorin e Gjuhës Shqipe fjala “Afrim” ka kuptimin e një veprimi dhe gjendjeje sipas kuptimeve të foljeve afroj e afrohem.

“Afrim i shpejtë (i dukshëm). Afrimi i pranverës (i festës). Afrimi i kongresit (i përvjetorit). Afrimi me shokët. Afrimi me bazën. Afrimi i mësuesit me nxënësit. Afrimi i shkollës me jetën…”, thuhet në Fjalor.

Ndërsa fjala ofrim, të cilën e përdor Buja në këtë rast, ka tjetër kuptim. Në këtë rast do të mund të thuhej se Ministria e Arsimit u ofron maturantëve testet, të cilat do t’i sprovojnë ata.

Sidoqoftë, testi i maturës shtetërore do të mbahet brenda dy ditëve, më 7 dhe 21 qershor, si dhe më 29 gusht e 6 shtator. Testi i parë ka 120 kërkesa nga lëndët e përgjithshme: gjuhë amtare, gjuhë angleze dhe matematikë. Ndërsa në testin e dytë ka 80 kërkesa të tjera dhe ndryshojnë varësisht prej drejtimeve të shkollave të mesme.