Auditorët në Ministrinë e Kulturës gjejnë kontrata, pagesa e avancime të jashtëligjshme

Ministria e Kulturës ka lidhur kontrata të jashtëligjshme, ka paguar nëpunës, me gjithë mungesën në punë, ka avancuar stafin në kundërshtim me rregulloret, e ka shpenzuar mjetet e subvencioneve për printime e furnizim me material shpenzues.

Këto janë vetëm disa prej shkeljeve që ka gjetur Zyra e Auditorit të Përgjithshëm për institucionin më të lartë kulturor në vend. Në raportin e auditimit për pasqyrat financiare për vitin 2014, ZAP-i në këtë institucion ka gjetur 24 shkelje. Veç tjerash, Ministria e Kulturës, Rinisë e Sportit ka marrë vërejtje edhe për avancat e paarsyetuara nga përfituesit, për furnizimin e automjeteve private të punonjësve me buxhet të shtetit, për tërheqje mjetesh pa arsyetim e të tjera.

Gjatë vitit që lamë pas MKRS-ja, e udhëhequr nga kabineti i ish-ministrit Memli Krasniqi, ka shpenzuar 85 për qind të buxhetit total. Institucionit, i cili çdo fillmvit ankohet për buxhetin e ulët, i kanë mbetur hiç më pak se 3 milionë euro suficit.
Për investime kapitale MKRS-ja kishte realizuar vetëm 70 për qind të buxhetit. Siç shkruhet në raportin e ZAP-it, ndër shkaqet kryesore për këtë nënshpenzim ishin mosimplementimi i disa projekteve të planifikuara dhe vonesat në procedurat e prokurimit.
“Planifikimi i buxhetit për investimet kapitale nuk ishte bërë në bazë të vlerësimeve reale ose trendit nga vitet paraprake, gjë që ka ndikuar në nivelin e ulët të realizimit (70%).

Këtë e dëshmon suficiti prej 3.700.000 eurosh. Trendi më i madh i shpenzimit vërehet në dymujorin e fundit të vitit, përderisa 1.081.294€ janë paguar për faturat e papaguara nga viti 2013”, shkruhet në raport. Sipas ZAP-it, këto kanë ndodhur ngase mungonte një politikë e duhur për ekzekutimin e pagesave dhe vonesave e ndërprerjeve të punimeve nga operatorët ekonomikë. Në këtë raport MKRS-ja ka marrë vërejtje edhe për mungesën e raportimit për të hyrat e realizuara.

http://koha.net/?id=4&l=65216