Hiqet fjala ‘gjenocid’

Sot, në orën 13:00 kryeministri Isa Mustafa do ta mbledh kabinetin qeveritar, ku do të konfirmojë gatishmërinë e saj për miratimin e projektligjit për Gjykatën Speciale.

Në mbledhje kabineti qeveritar do të konfirmojë faktin se i ka harmonizuar qëndrimet me Bashkimin Evropian për përmbajtjen e projektligjit për këtë gjykatë.

“Top Channel” ka mësuar nga burime brenda qeverisë se projektligji tanimë është finalizuar me një kompromis të vetëm me BE-në, që të hiqet fjala “genocid”. “Qeveria do të konfirmojë gatishmërinë sepse nuk mund ta miratojë këtë projektligj pa u bërë së pari ndryshimet kushtetuese që lejojnë formimin e gjykatës”, kanë thënë burimet.

Pas kësaj deklarate të qeverisë, “Top Channel” mëson se Kryesia e Kuvendit do të mblidhet të hënën e javës së ardhshme dhe do të caktojë seancën për ndonjë ditë gjatë javës, ku do të miratohen amendamentet kushtetuese për gjykatën.

Sipas procedurave, pas miratimit të ndryshimeve kushtetuese, qeveria do të miratojë menjëherë projektligjin për Specialen dhe procedimin në Kuvend.