Afro 500 mësimdhënës të jashtëm nuk kanë vend në UP

Universiteti i Prishtinës, vitin e ardhshëm akademik, do të angazhojë 504 mësimdhënës të jashtëm më pak sesa që janë angazhuar në vitet e fundit. Këto të dhëna janë precizuar në konkursin e fundit për staf të angazhuar në UP, i cili është mbyllur të martën (sot).

Bazuar në dosjen e konkursit, rezulton se UP-ja në vitin e ri akademik 2015-2016 do të angazhojë nga jashtë gjithsej 323 mësimdhënës (profesorë dhe asistentë), shkruan sot “Koha Ditore”.

UP-ja më herët pati publikuar të dhëna se në çdo vit akademik ka pasur të angazhuar afro 830 mësimdhënës të jashtëm, të cilët nuk kanë kontrata të përhershme me Universitetin, por paguhen vetëm për orë të mbajtura, në njësitë akademike dhe lëndët të cilat nuk mund të mbulohen nga stafi i rregullt i tij.

Më së shumti kërkesa për staf të angazhuar rezulton se ka për Fakultetin Filozofik, ku kërkohen gjithsej 55 mësimdhënës dhe asistentë për 47 lëndë, pasi që ka lëndë në të cilën kërkohet më shumë se sa një profesionist. E pas tij radhitet Fakulteti i Arteve, ku për 43 lëndë kërkohen 47 mësimdhënës.

http://koha.net/?id=27&l=62132