Pesë edicionet e një manifestimi
RajoniPress
11:05, 15 Qershor, 2015
Gjilan – Dita e djeshme e 14 qershorit 2015, shënoi Pesë Edicionet e Manifestimit rajonal të poezisë, i veçantë dhe i pari i këtij lloji në këto hapësira të Ballkanit, edhe për nga titulli, madje, “Trekëndëshi Poetik i Paqes”, që u mbajt në Grykën e Karadakut.
I nisur në Zonën kufitare ku natyra i bëri bashkë shqiptarët e, fati i ndau tashmë në tri shtete, ky Manifestim tuboi mbi 100 poetë e artdashës nga katër shtete të Ballkanit për ta nderuar 12 Qershorin, Ditën e Paqes e të Lirisë për Kosovën.
Hapja e Manifestimit ndodhi, si edhe herave tjera, te Guri i Kufirit në fshatin Stançiq, edhe si një lloj proteste për mos-hapjen e vendkalimit kufitar tash e gjashtë vite, përkundër përcaktimit të vijës së demarkacionit si dhe të një marrëveshjeje ndërqeveritare Kosovë – Maqedoni.
Vazhdoi më pas, në ambientet e bukura të restaurant DUNAV-it, ku u shtjellua tema bosht e Manifestimit, “Poezia e Ibrahim Kadriut”, në 70 vjetorin e lindjes dhe 50 vjetorin e krijimtarisë si tij letrare e publicistike.
Referuan me shumë kompetencë, studiuesi i letërsisë, Mahmud Hysa si dhe kritiku letrar Ramadan Musliu.
Poezi të Ibrahim Kadriut deklamoi, artisti i ri, Adem Ajvazi.
Manifestimi u përmbyll me “Kohën e Poezisë” – Orën letrare të Manifestimit, ku, poetë nga Tirana, Durrësi, Rogozhina, Elbasani, Tetova, Shkupi, Kumanova, Presheva, Bujanovci, Dardana, Prishtina, Drenasi, Klina, Prizreni, Shtimja, Ferizaji , Vitia e Gjilani lexuan krijimet e tyre më të reja, të cilat do të botohen në edicionin e radhës, njëjtë, siç u botuan, u prezantuan dhe u shpërndanë për pjesëmarrësit edhe krijimet e përmbledhura në një libër të edicionit të kaluar, falë MKRS-së si mbështetëse e këtij Manifestimi dhe, Komunës së Gjilanit.
Një ndihmesë të madhe në organizimin, na e ofroi edhe Shoqata kulturore – humanitare :Kurexhaj” nga Zhegra si dhe restaurant “Dunavi” e restaurant – bar “MBRETI” në Lladovë ku u shtrua dreka me ushqime të traditës për të gjithë pjesëmarrësit e “Trekëndëshit poetik të paqes’.
I falënderojmë dhe ju shprehim mirënjohje të gjithëve, veçmas poetëve që udhëtuan qindra kilometra për t’u bërë pjesë e kësaj dite të shënueshme për Kosovën e për Gjilanin.
Ars Clubi “Beqir Musliu” është i nderuar t’i mirëpres dhe në edicionin vijues të vitit 2016 –të ka thënë Sabit Rrustemi kryetar i Ars Clubit “Beqir Musliu”./rajonipress/
