Kushtëzimi nga BE për themelimin e Speciales, i padrejtë

Diplomatët e BE-së kanë kushtëzuar deputetët e Kuvendit të Kosovës që të votojnë Gjykatën Speciale, ose në të kundërtën nuk do të ketë nënshkrim të MSA-së e as liberalizim të vizave.

“Nëse nuk e bëjnë Gjykatën, ta harrojnë MSA-në dhe liberalizimin e vizave”, i ka thënë një diplomat evropian “Kohës Ditore”, duke theksuar se një pozicion i tillë nuk do të thuhet publikisht, por liderëve tashmë u është bërë i qartë, raporton KTV.

Ky kushtëzim, sipas analistëve kosovarë, nuk është i drejtë.

Shpend Kursani thotë se vetë Gjykata Speciale është e panevojshme dhe e dëmshme për Kosovën.

Qasja kushtëzuese e BE-së nuk është fare befasuese për analistin Imer Mushkolaj. Sipas tij, kjo është vetëm vazhdimësi e shantazheve karshi Kosovës. Mushkolaj thotë se deputetët do ta votojnë Gjykatën Speciale, e cila do të sqaronte shumë gjëra.

Por, Shpend Kursani thotë se kushtëzimet nuk do të ndalën dhe se nuk është mirë të votohet.

E ministri i Integrimeve Evropiane, Bekim Çollaku, e ka mohuar të ketë lidhje nënshkrimi i Marrëveshjes së Stabilizim Asociimit me themelimin e Gjykatës Speciale, transmeton Koha.net.

“Shtetet partnere të Kosovës kanë bërë thirrje që Gjykata Speciale të themelohet, por një gjë e tillë nuk ndërlidhet me nënshkrimin e MSA-së dhe me procesin e liberalizimit të vizave. Së paku asnjë zyrtar i BE-së nuk më ka thënë mua që këto gjëra janë të ndërlidhura me njëra-tjetrën”, i ka thënë Çollaku Radio Kosovës.

http://koha.net/?id=27&l=60828