Dorëzohet raporti, priten përgjigje për vizat

Ministri i Integrimit Evropian, Bekim Çollaku, ia ka dorëzuar raportin e kompletuar për liberalizimin e vizave, përfaqësuesit special të Bashkimit Evropian në Prishtinë, Samuel Zhbogar në mënyrë që ai t’ia përcjellë këtë raport Komisioni Evropian. Me këtë raport institucionet e Kosovës e dëshmojnë punën e tyre në përmbushjen e kritereve të paraqitura në udhërrëfyesin për liberalizimin e vizave dhe kështu kërkojnë heqjen e vizave për qytetarët e Kosovës.

Ministri Çollaku përmes një postimi në profilin e tij në “Facebook” ka bërë të ditur dorëzimin e këtij raporti.

“Sot e dorëzova raportin e fundit gjithëpërfshirës të institucioneve të Republikës së Kosovës mbi përmbushjen e kritereve të udhërrëfyesit për liberalizim të vizave tek Përfaqësuesi Special i BE-së, Samuel Zhbogar që ta përcjellë atë te Komisioni Evropian. Falënderoj të gjithë institucionet e përfshira dhe shoqërinë civile për të gjithë punën e bërë si në zbatimin dhe raportimin e kërkesave dhe rekomandimeve të këtij procesi”, ka shkruar Çollaku.

Ai më tej ka thënë se raporti është gjithëpërfshirës dhe do të shërbejë si një bazë e fuqishme për ta përmbyllur me sukses këtë proces shumë të rëndësishëm./zeri/