Vllasi: Krijimi i Speciales nga OKB ringjall Rezolutën 1244

Analisti politik, Azem Vllasi, vlerëson se Gjykata Speciale është më mirë që të themelohet nga Kuvendi i Kosovës, sesa të vendoset në Këshillin e Sigurimit të Kombeve të Bashkuara.

Sipas tij, nëse Kuvendi dështon të themelojë Specialen, do të shkonte një mesazh shumë i keq të faktorët ndërkombëtar se në Kosovë pushteti po e sfidon drejtësinë.

“Sipas të gjitha gjasave procedura në lidhje me aprovimin e amendamenteve kushtetuese për Gjykatën Speciale është në rrezik. Si duket po vije në pyetje numri i votave të deputetëve dhe në këtë mënyrë po rrezikohet që këtë vendim të merr Këshilli i Sigurimit të Kombeve të Bashkuara”, ka thënë Vllasi për ORAinfo.

Sipas tij, në rast se krijimi i Gjykatës Speciale i lihet në duar të Këshillit të Sigurimit, atëherë me fajin e kosovarëve po fuqizohet Rezoluta 1244 si dhe po fuqizohet ndikimi i këtij Këshilli në emërimin dhe formimin e Speciales.

“Në një situatë të tillë, po lejohen mundësit që Këshilli i Sigurimit të këtë me shumë ndikim në formimin dhe emërimin e gjykatësve, ku pastaj do të këtë rus, kinez e shumë të tjerë”, është shprehur Vllasi.

Prandaj sipas tij, pasi që kjo gjykatë do të themelohet në çdo variant, shumë më mirë është që këtë ta bëjë Kuvendi i Kosovës, duke e krijuar vet bazën juridike, sesa për të të vendos Këshilli i Sigurimit.