Suspendohet “Baba” i tenderëve

Shefi i prokurimit në Ministrinë e Infrastrukturës, Nexhat Krasniqi, është suspenduar nga puna për shkak se ndaj tij është ngritur aktakuzë për korrupsion. Krasniqi ka qenë zyrtari më i përfolur i prokurimit si i dyshuar për korrupsion, pasi që për vite të tëra ai ka drejtuar zyrën e Prokurimit të Ministrisë së Transportit, e cila më vonë është shndërruar në Ministri të Infrastrukturës, ku përmes saj janë shpenzuar qindra miliona euro.

Kohë më parë përmes një kërkese Ministria ka kërkuara nga prokurori Besim Kelmendi informacione rreth aktakuzës për të cilën ngarkohet Krasniqi, e ku pas marrjes së përgjigjes Ministria ka vendosur që ta suspendojë nga puna shefin e prokurimit.

Derisa të përfundojë lënda Krasniqi do të marrë nga Ministria gjysmën e pagës, ashtu edhe siç parashihet me ligj. Për këtë çështje gazeta “Zëri” i ka dërguar pyetje Ministrisë, por për dy ditë nuk ka marrë përgjigje./zeri/