Krimet e “terrorit shtetëror”

Tina 6-vjeçare kujton momentin kur policët e maskuar të njësisë speciale ia kanë shkelmuar babanë teksa po dilnin prej shtëpisë.“I kanë mëshu këtu poshtë”, thekson Tina flokëkaçurrele, teksa përkulet që ta prekë këmbën e djathtë të tregojë me saktësi vendin në këmbën e djathtë. Babanë e Tinës nuk e mbajtën këmbët. U shtri përtokë. Policët nuk e kishin ndalur dhunën as atëherë kur e kishin shtrirë përtokë, shkruan sot “Koha Ditore”.

“Tregoji qysh i ka mëshu në krye, ku i ka dalë gjak”, ndërhyn halla Sahadete Hajdini. Grushton dorën në tëmth. Zonja Hajdini kishte vendosur që fundjavën ta kalonte te nëna dhe vëllai. Dy fëmijët e saj janë bashkëmoshatarë të Tinës. Hallë Sehadetja thotë se krismat që nisën rreth orës katër e gjysmë të mëngjesit të së shtunës i zgjuan edhe fëmijët.

“Mundoheshim t’i qetësonim fëmijët, duke i gënjyer se kanë hyrë hajnat dhe se policia është duke i ndjekur”, thekson zonja Hajdini, në fund të dyzetave. Familja Hajdini kishte qëndruar deri në orën njëmbëdhjetë e ngujuar në shtëpi nën breshërinë e plumbave dhe granatave që vinin nga toka e ajri.

“Nuk e dinim se kah po vinim. Në të gjitha anët dëgjoheshin krisma”, thekson zonja Hajdini, që pas më shumë se gjashtë orësh tmerri kishte vendosur të dilte të fliste me policët. “Dola me teshë të bardhë me tregu se vetëm duam të largohemi”. Policët i kishin shoqëruar deri në dalje të rrugës, duke i kërcënuar e fyer.

http://koha.net/?id=27&l=57188