Luta: Kabineti i kryeministrit Mustafa po i jep mbështetje të fuqishme projekteve tona

Gjilan – Gjatë këtyre katër muajve të vitit 2015 pothuajse i tërë kabineti i kryeministrit Mustafa ka ‘zbarkuar’ në Gjilan, duke ofruar mbështetje të fuqishme për projektet tona. Ky është kthim kujdesi i qendrës për Gjilanin thotë Lutfi Haziri.

Shoqëria civile në Gjilan po i sheh ndryshe ardhjet e qeveritarëve dhe të kryeministrit në Gjilan. Madje ato po shihen edhe si agjenda partiake pa ndonjë rezultat konkret në realizimin e projekteve për Gjianin.

Por kështu nuk mendon Lutfi Haziri i cili thotë se ka mbështetje nga kabineti qeveritar dhe se Gjilanit tani i është kthyer kujdesi i qendrës. “Gjatë këtyre katër muajve të vitit 2015 pothuajse i tërë kabineti i kryeministrit Mustafa ka ‘zbarkuar’ në Gjilan, duke ofruar mbështetje të fuqishme për projektet tona. Ky është kthim kujdesi i qendrës për Gjilanin” thotë Lutfi Haziri.

Shaban Terziu nga shoqëria civile thotë se Isa Mustafa po vije në Gjilan vetëm për dekor derisa po harron premtimet e mëdha dhe projektet urgjente që ka nevojë ky qytet. “Fatkeqësisht Gjilani dhe Anamorava sërish mbeten rajoni më i pazhvilluar dhe më i izoluar. S`ka projekte, s`ka investime serioze. Ende po merremi me Mirushën dhe ende duhet të presim nëse do të fillojë ndonjë rrugë apo autostradë që dyshojë shumë se mund të ndodhë” tha Terziu.

Terziu thotë se kryeministri duhet të largohet nga agjendat dhe ndikimet partiake. “Edhe herën e fundit kur erdhi në Gjilan takoj dosllar e militant të LDK-së, por nuk foli e as që pranojë të flas me shoqërinë civile. E vetmja deri tashti që ka dhënë shembull për të komunikuar me qytetarët ishte Atifete Jahjaga e cila edhe pse nuk ka kaluar mirë megjithatë i ka dëgjuar hallet e qytetarëve” shprehet Terziu.

Terziu tha se kryeministri duhet të dëshmojë se është në shërbim të qytetarëve e jo të partisë.”Anamorava dhe Gjilani presin shumë nga Isa Mustafa. Ne ende po merremi me Mirushën i cili projekt ende nuk ka përfunduar. Dhe ende nuk kemi ndonjë projekt serioz që pritet ta përkrah Qeveria” u shpreh Terziu./rajonipress/