Marrëveshja etnike për drejtësinë

Përfaqësues të komuniteteve pakicë joserbe dhe opozita e kanë vlerësuar skandaloze marrëveshjen për drejtësinë, e cila u arrit ndërmjet Kosovës dhe Serbisë, muajin e kaluar, në Bruksel.

Aty flitet vetëm për dy komunitete – shqiptare dhe serbe, duke përjashtuar kështu komunitetet e tjera pakicë, shkruan sot Koha Ditore.

Me këtë rast, përfaqësues të pakicës joserbe vlerësojnë se është shkelur Kushtetuta, përkatësisht parimi i mosdiskriminimit, si dhe Ligji mbi gjykatat.

Rrjedhimisht, nëse nuk do të ketë ndryshim, ata nuk e kanë përjashtuar mundësinë që t’i drejtohen Gjykatës Kushtetuese dhe instancave tjera ndërkombëtare për interpretim.

Marrëveshja për drejtësinë që u firmos në mëngjesin e 10 shkurtit ndërmjet kryeministrit të Kosovës, Isa Mustafa, dhe atij serb, Aleksandar Vuçiq, e dëshmuar nga përfaqësuesja e BE-së, Federica Mogherini, u është dërguar deputetëve të Kosovës në adresën e tyre tek të premten e javës së kaluar, me gjithë premtimin e kryeministrit se këtë do ta bënte një ditë pas debatit të zhvilluar në Kuvend, muajin e kaluar.

Sa i përket përmbajtjes, e gjithë marrëveshja në 15 pikat e saj u referohet vetëm dy komuniteteve.