Të fortët e PD-së ndajnë rrugët mes akuzave për korrupsion e tradhti

E kanë drejtuar Partinë e Drejtësisë bashkë prej kohësh, njëri kryetar e tjetri nënkryetar, por përfundimisht Ferid Agani e Gëzim Kelmendi, apo siç janë quajtur nga elektorati i tyre të fortët e PD-së, kanë ndarë rrugët me shumë akuza e kundërakuza, shkrun sot Koha Ditore.

Madje, edhe me akuza për korrupsion, tradhti dhe shitje vlerash kombëtare.

Në njërën anë, PD-ja që për kryetar ka ministrin Ferid Agani, e ka sulmuar tashmë ish-nënkryetarin Kelmendi se ka tradhtuar elektoratin e kësaj partie dhe se ka vënë në lojë edhe vlerat kombëtare e shtetndërtuese të Kosovës, nga ana tjetër më vonë, vetë Kelmendi, në një prononcim për gazetën, është kundërpërgjigjur se është pikërisht Agani që dyshohet për vepra korruptuese dhe që nuk ka të drejtë të flasë për kurrfarë vlerash kombëtare.